ईसा तडवी, प्रतिनिधी
पाचोरा, 17 मार्च: पाचोरा शहरात स्टॅम्प विक्रीदरम्यान अतिरिक्त पैसे मागून लाच स्वीकारल्याचा प्रकार उघडकीस आला असून, अधिकृत स्टॅम्प वेंडर योगेश ईश्वरलाल संघवी (वय 49) व त्यांचा भाऊ प्रशांत संघवी यांच्याविरोधात जळगाव लाचलुचपत प्रतिबंधक विभागाने कारवाई केली आहे.
नेमकं प्रकरण काय? –
मिळालेल्या माहितीनुसार, तक्रारदार हे 15 मार्च 2026 रोजी जामनेर-पाचोरा रोडवरील प्रशांत झेरॉक्स येथे 500 रुपयांच्या दराचे १० स्टॅम्प खरेदीसाठी गेले होते. त्यावेळी ५,००० रुपयांच्या स्टॅम्पसाठी ५,५०० रुपये देण्याची मागणी करण्यात आली. शासकीय दरापेक्षा ५० रुपये जादा दराने प्रत्येक स्टॅम्प देण्याचा आग्रह धरत ही रक्कम कमी होणार नसल्याचे संघवी यांनी स्पष्ट केले.
यानंतर तक्रारदार यांनी ही बाब जळगाव लाचलुचपत प्रतिबंधक विभागाकडे (ACB) मांडली. दरम्यान, जळगाव एसीबीने आज १७ मार्च २०२६ रोजी सापळा रचून तक्रारीची पडताळणी केली असता, योगेश संघवी यांनी पुन्हा ५०० रुपयांची अतिरिक्त मागणी केल्याचे निष्पन्न झाले. यावेळी त्यांच्या सांगण्यावरून त्यांचे भाऊ प्रशांत संघवी यांनी पंचासमक्ष ही ५०० रुपयांची लाच रक्कम स्वीकारली. या प्रकरणी दोघांविरुद्ध पाचोरा पोलीस स्टेशनमध्ये गुन्हा दाखल करण्यात आला असून पुढील तपास सुरू आहे.
यांनी केली कारवाई –
लाचलुचपत प्रतिबंधक विभाग जळगावचे पोलीस उपधीक्षक योगेश ठाकूर यांच्या नेतृत्वात पोलीस निरीक्षक हेमंत नागरे, पो.अं. बाळू मराठे, पो.अं. भूषण पाटील, तपास अधिकारी स्मिता नवघरे यांनी ही सापळा कारवाई केली.
