चोपडा, 7 जुलै: शहरातील सानेगुरुजी वसाहत परिसरात कत्तलीच्या उद्देशाने बेकायदेशीररीत्या डांबून ठेवलेल्या गोवंशाची चोपडा शहर पोलिसांनी धाडसी कारवाई करत सुटका केली. या प्रकरणी एका संशयिताविरुद्ध महाराष्ट्र प्राणी संरक्षण अधिनियमांतर्गत गुन्हा दाखल करण्यात आला असून, 1 लाख 20 हजार रुपये किमतीचे पशुधन जप्त करण्यात आले आहे.
मंगळवारी (7 जुलै) मध्यरात्री साडेबारा वाजण्याच्या सुमारास चोपडा शहर पोलीस ठाण्याचे कर्मचारी नियमित गस्तीवर होते. त्यावेळी शहरातील बंद कत्तलखान्यासमोरील के.जी.एन. कॉलनी परिसरातील एका घराजवळ संशयास्पद हालचाली दिसून आल्याने पोलीस कॉन्स्टेबल अक्षय विजय पाटील आणि त्यांच्या पथकाने तातडीने छापा टाकला.
छाप्यात संशयित इद्रीस ईस्माईल शेख (रा. के.जी.एन. कॉलनी, चोपडा) याने आपल्या घराच्या ओट्यावरील पत्र्याच्या शेडमध्ये गोवंशीय जनावरे चारा-पाण्याविना अंधारात बांधून ठेवल्याचे आढळून आले. कत्तल करण्याच्या उद्देशानेच ही जनावरे डांबून ठेवण्यात आल्याचा प्राथमिक संशय व्यक्त करण्यात आला असून त्यानुसार पोलिसांनी ही कारवाई केली.
या कारवाईदरम्यान पोलिसांनी 50 हजार रुपये किमतीची सात वर्षीय गावराण गाय, 50 हजार रुपये किमतीचा सात वर्षीय जखमी गावराण बैल आणि 20 हजार रुपये किमतीचे सुमारे एक वर्षाचे वासरू, असे एकूण 1 लाख 20 हजार रुपये किमतीचे पशुधन ताब्यात घेतले.
या प्रकरणी पोलीस कॉन्स्टेबल अक्षय विजय पाटील यांच्या फिर्यादीवरून संशयित इद्रीस ईस्माईल शेख याच्याविरुद्ध चोपडा शहर पोलीस ठाण्यात गुन्हा क्रमांक 291/2026 नुसार महाराष्ट्र प्राणी संरक्षण अधिनियम, 1976 मधील सुधारित कलम 5 (अ), 5 (ब) व 9 अन्वये गुन्हा दाखल करण्यात आला आहे. पोलीस निरीक्षक पवन प्रतापराव देसले यांच्या मार्गदर्शनाखाली सहाय्यक पोलीस फौजदार दीपक विसावे या प्रकरणाचा पुढील तपास करीत आहेत.
