नवी दिल्ली, 7 फेब्रुवारी : केंद्रीय निवडणूक आयोगाच्या निर्णयानुसार राष्ट्रवादी काँग्रेस पक्ष आणि चिन्ह अजित पवार गटाला मिळाल्यानंतर शरद पवार गटाने नाव आणि चिन्ह केंद्रीय निवडणूक आयोगाकडे काही पर्याय पाठवायचे होते. यामध्ये शरद पवार गटाला नवे नाव मिळाले असून चिन्हाबाबत मात्र, अद्यापही निर्णय झाला नाही.
शरद पवार गटाला नवीन नाव-
शरद पवार गटाला ‘राष्ट्रवादी काँग्रेस पक्ष शरदचंद्र पवार’ हे नाव मिळाले आहे. केंद्रीय निवडणूक आयोगाने शरद पवार गटाला हे नाव दिले आहे. राज्यसभेच्या निवडणुकीच्या पार्श्वभूमीवर हे नाव देण्यात आले असल्याची माहिती समोर आली आहे. पक्षाच्या चिन्हावर मात्र अद्याप काही निर्णय झाला नसल्याची माहिती आहे.
राष्ट्रवादी काँग्रेस पक्ष शरदचंद्र पवार –
राष्ट्रवादी काँग्रेस पक्ष आणि चिन्ह हे अजित पवार गटाकडे गेल्यानंतर शरद पवार गटाला नव्या नावासाठी आणि चिन्हासाठी निवडणूक आयोगाला काही पर्याय द्यायचे होते. त्यामध्ये शरद पवार गटाने नॅशनॅलिस्ट काँग्रेस पार्टी शरद पवार, नॅशनॅलिस्ट काँग्रेस पार्टी शरदचंद्र पवार, नॅशनॅलिस्ट काँग्रेस पार्टी शरदराव पवार ही तीन नावे दिली होती. त्यामध्ये निवडणूक आयोगाने ‘नॅशनॅलिस्ट काँग्रेस पार्टी शरदचंद्र पवार’ म्हणजे ‘राष्ट्रवादी काँग्रेस पक्ष शरदचंद्र पवार’ हे नाव त्यांना दिले आहे.
नवीन नावावर निवडणूक लढवता येणार –
शरद पवार गट हा वटवृक्ष या नव्या चिन्हासाठी आग्रही असल्याची माहिती समोर आली आहे. त्याबद्दलचा निर्णय लवकरच लागण्याची शक्यता वर्तवली जात आहे. दरम्यान, येत्या काही दिवसात राज्यसभेच्या निवडणुका असून त्या पार्श्वभूमीवर शरद पवार गटाला हे नवीन नाव देण्यात आले आहे. त्यामुळे शरद पवार गटाला आता या नवीन नावावर निवडणूक लढवता येणार आहे.
हेही वाचा : अजित पवार गटाला मिळाला राष्ट्रवादी पक्ष आणि घड्याळ चिन्ह, अजित पवार यांची पहिली प्रतिक्रिया काय?
