पाचोरा, 31 डिसेंबर : भारतीय राष्ट्रीय काँग्रेसचा स्थापना दिवस 28 तारखेला सर्वत्र साजरा करण्यात आला. या निमित्ताने पाचोरा तालुका काँग्रेसच्या वतीनेही विशेष कार्यक्रमाचे आयोजन करण्यात आले होते. काँग्रेस पक्षाच्या 138 व्या स्थापना दिनाचे औचित्य साधून पाचोरा येथे रक्तदानासाठी रक्तदात्यांचा रक्तगृप तपासणी करण्यात आली.
गरजू रुग्णांना कायम रक्ताची निकड असते, त्यामुळे अशावेळी रक्तदात्यांचा शोध घेणे अवघड होते. यासाठी पाचोरा तालुका काँग्रेस अध्यक्ष सचिन सोमवंशी यांच्या संकल्पनेतून विशेष कार्यक्रमाचे आयोजन करण्यात आले होते.
पाचोरा येथील डॉ. वैभव सुर्यवंशी यांच्या लिलावती हॉस्पिटलमध्ये सुधन लॅब च्या सौजन्याने रक्तगृप तपासणी शिबिराचे आयोजन करण्यात आले होते. यावेळी रक्तदान करणाऱ्या नवीन दात्यांची रक्तगृप तपासणी करण्यात आली. तसेच रक्तगृप तपासणी करून रक्तदात्यांची यादी तयार करण्यात आली.
याप्रसंगी, शहर अध्यक्ष अॅड. अमजद पठाण, आरोग्य सेवा सेल अध्यक्ष डॉ. फिरोज शेख, अल्ताफ शेख, समाधान ठाकरे, रवी सुरवाडे, तौफिक शेख, अरबाज शेख, सुनिता पाटील, शुभांगी ढाकरे, अनिता पाटील, आदी उपस्थित होते. या कार्यक्रमाला शहर व ग्रामीण भागातील रक्तदात्यांची उत्स्फूर्त प्रतिसाद दिला.
