नाशिक, 23 जून : नाशिकमधील पंचवटीच्या राजवाडा परिसरात हिंदू युवा वाहिनीच्या नावाच्या लेटरहेडवर अनुसूचित जाती प्रवर्गातील नागरिकांविषयी आक्षेपार्ह मजकुराची छापलेली पत्रके घराबाहेर टाकण्यात आल्याचे प्रकरण काल समोर आले होते. यानंतर पंचवटी परिसरात शनिवारी दिवसभर तणावाची परिस्थिती निर्माण झाली होती. याप्रकरणात पोलिसांनी संशयित आरोपी अमोल चंद्रकांत सोनवणे यास ताब्यात घेतले. दरम्यान, गृहमंत्री देवेंद्र फडणवीस यांनी या प्रकरणाची दखल घेतली आहे.
गृहमंत्री देवेंद्र फडणवीस काय म्हणाले? –
गृहमंत्री देवेंद्र फडणवीस याबाबत म्हणाले की, पोलिसांनी संपूर्ण प्रकरणाचा उलगडा केला आहे. पंचवटीतील काळाराम मंदिराच्या अवतीभवती राहणाऱ्या लोकांना धमकीचे पत्र प्रकाशित करण्यात आले होते. ज्याने ते प्रकाशित केले होते, त्याला अटक झाली आहे. त्याने दुसऱ्या एका व्यक्तीशी जुने वैमनस्य काढण्यासाठी दलित समाजाला धमकी देणारा, निळे झेंडे लावू नका, असे मजकूर असलेला पत्रक प्रकाशित केले होते.
ज्याला पोलिसांनी अटक केलीय त्याच्या अन्य कोणी पाठीशी आहेत का? दंगल घडवण्यासाठी हे पत्रक काढण्यात आले होते का?, याचा शोध पोलीस घेत असल्याची माहिती देवेंद्र फडणवीसांनी दिलीय.
नेमकं काय घडलं होतं? –
पंचवटी येथील राजवाडा परिसरात काल हिंदू युवा वाहिनीच्या लेटर हेडवर एका समाजाविरुद्ध आक्षेपार्ह मजकूर प्रिंट करून पत्रके परिसरात वाटल्यामुळे समाज संतप्त झाला होता. दरम्यान, या परिसरात तणावाचे वातावरण निर्माण झाले होते. या घटनेनंतर राजवाड्यातील शंभर ते दीडशे नागरिकांनी मोर्चा काढून घोषणाबाजी करत पोलीस ठाण्यासमोर ठिय्या दिला. दरम्यान, या प्रकरणाची गृहमंत्री देवेंद्र फडणवीस यांनी तत्काळ दखल घेत चौकशीचे आदेश दिले आहेत.
