पाचोरा (प्रतिनिधी), 17 मे : पाचोरा तालुक्यातून एक लाचखोरीची धक्कादायक घटना समोर आली आहे. पाचोरा तालुक्यातील बांबरूड राणीचे येथील भगवान दशरथ कुंभार (वय-44 वर्ष) या व्यक्तीला 1360 रुपयांची लाच घेताना रंगेहाथ पकडण्यात आले.
काय आहे संपूर्ण प्रकरण –
तक्रारदार यांची लासगाव शिवारात आईच्या नावे शेत गट क्रं.128/ब/1 हीचे क्षेत्र 0.91हेक्टर आर चौ.मी क्षेत्र असलेली शेत जमीन आहे. सदर शेतजमीनीवर तक्रारदार यांच्या आईच्या नावे बँक ऑफ बडोदा शांखा -सामनेर या बँकेकडून 1 लाख 30 हजार रुपये पीककर्ज मंजुर करण्यात आले आहे. तरी सदर मंजुर झालेल्या पिककर्जाचा बोझा शेतजमिनीचे 7/12 उताऱ्यावर घेण्यासाठी तक्रारदार व्यक्ती बांबरुड तलाठी कार्यालयात गेले होते.
यावेळी सदर कार्यालयात भगवान दशरथ कुंभार (वय-44 वर्ष) या खासगी व्यक्तीने तक्रारदार यांना माझे तलाठी अप्पांशी चांगले संबंध आहेत, तुमच्या आईच्या नावे मंजुर झालेल्या पिककर्जाचा बोझा शेतजमीनीचे 7/12 उताऱ्यावर लावण्याचे काम तलाठी अप्पांकडून करून आणून देतो, असे सांगितले तसेच या कामासाठी तक्रारदार यांच्या आईचे, तक्रारदार आणि साक्षीदाराचे आधारकार्ड, झेरॉक्स आणि आईचे 3 आणि तक्रारदार यांचे 2 पासपोर्ट फोटो सांगितले.
यासोबतच भगवान दशरथ कुंभार या व्यक्तीने तक्रारदार यांच्याकडे पंचासमक्ष आईच्या नावे मंजुर झालेल्या पिककर्जाचा बोझा शेतजमीनीचे 7/12 उताऱ्यावर लावण्याचे काम तलाठी अप्पांकडून करून आणून देण्याच्या मोबदल्यात 1360/- रुपये लाचेची मागणी केली.
यानंतर तक्रारदाराने लाचलुचपत प्रतिबंधक विभागाकडे तक्रार केली. यानंतर लाचलुचपत प्रतिबंधक विभागाने यशस्वी सापळा रचला आणि मागणी केलेली लाच रक्कम आरोपीला बांबरुड येथील त्यांचे स्वतःचे घरी पंचासमक्ष स्वतः स्विकारतांना रंगेहाथ पकडण्यात आले आहे. याप्रकरणी पाचोरा पोलीस स्टेशन येथे गुन्हा दाखल करण्यात येत आहे.
ही कारवाई सापळा पर्यवेक्षण अधिकारी शशिकांत पाटील (पोलिस उप अधीक्षक,ला.प्र.वि. जळगांव) यांच्या मार्गदर्शनाखाली पोलीस निरीक्षक एन.एन.जाधव यांच्यासोबत पोलीस निरीक्षक संजोग बच्छाव, पो.ना. ईश्वर धनगर, पो.कॉ.राकेश दुसाने, स.फौ. दिनेशसिंग पाटील, स.फौ. सुरेश पाटील, पो.हे.कॉ.सुनिल पाटील, पो.हे.कॉ.रविंद्र घुगे, पो.ना.जनार्दन चौधरी, पो.ना.किशोर महाजन, पो.ना.सुनिल वानखेडे, पो.ना.बाळु मराठे, पो.कॉ.अमोल सुर्यवंशी, पो.कॉ.प्रणेश ठाकुर. यांनी केली.
अ‍ॅन्टी करप्शन ब्युरो विभागाकडून आवाहन –
कोणत्याही शासकीय अधिकारी/कर्मचारी यांनी किंवा त्यांच्या वतीने खासगी व्यक्तीने कोणतेही शासकीय काम करून देण्यासाठी लाचेची मागणी केल्यास नागरिकांनी खाली दिलेल्या नंबरवर तात्काळ संपर्क साधावा, असे आवाहन अ‍ॅन्टी करप्शन ब्युरो विभागाकडून करण्यात आले आहे.
अ‍ॅन्टी करप्शन ब्युरो,जळगाव. अल्पबचत भवन, जिल्हाधिकारी कार्यालय आवार, जळगांव
@ दुरध्वनी क्र. 0257-2235477
@ मोबा.क्र. 8766412529
@ टोल फ्री क्र. 1064
