ईसा तडवी, प्रतिनिधी
पाचोरा, 3 जुलै : पाचोरा- भडगाव तालुक्यातील शेतकऱ्यांनी पीक विम्या संदर्भातील त्यांना येत असलेल्या अडचणींबाबत पाचोरा- भडगाव विधानसभा निवडणूक प्रमुख अमोल शिंदे यांना सांगितले होते. या पार्श्वभूमीवर अमोल शिंदे यांनी जिल्हाधिकारी आयुष प्रसाद व जिल्हा अधीक्षक कृषी अधिकारी तडवी यांची भेट घेत पाचोरा व भडगाव तालुक्यातील सोयाबीन उत्पादक शेतकऱ्यांना पिक विमा काढताना येत असलेल्या समस्या मांडल्या. तसेच निवेदन देऊन सोयाबीनचा पिक विम्यात समावेश करण्याची मागणी अमोल शिंदे यांनी केली.
पिक विम्यासंर्भात शेतकऱ्यांना अडचणी –
पाचोरा आणि भडगाव तालुक्यातील सोयाबीन लागवड केलेले शेतकऱ्यांना 1 रुपयामध्ये प्रधानमंत्री पिक विमा योजनेत लाभ घेता येत नसल्याने पाचोरा-भडगाव तालुक्यातील शेतकऱ्यांनी शिंदे यांच्याशी सदर समस्या मांडून पिक विमा योजनेत सहभाग घेता यावा, अशी मागणी केली होती. या संदर्भात सविस्तर माहिती घेतली असता सेतू सुविधा केंद्रावर पीक विमा काढताना संबंधित पोर्टलवर पाचोरा व भडगाव तालुक्यामध्ये सोयाबीन पिकाचा पर्याय उपलब्ध नसल्याने शेतकऱ्यांची मोठी अडचण होताना दिसत आहे.
शेतकऱ्यांची समस्या मंत्र्यांपर्यंत पोहचवणार –
मागील वर्षापेक्षा सोयाबीन पिकाचा पेरा यावर्षी वाढला असून मागील वर्षी देखील हाच मुद्दा आम्ही प्रशासनाकडे मांडला होता. परंतु, आज पावतो या संदर्भात प्रशासनाने व सदर विमा कंपनीने यात कुठलीही उपाययोजना केली नसून मागील वर्षा प्रमाणे यावर्षी देखील सोयाबीन उत्पादक शेतकऱ्यांना पिक विमा काढण्यास अडचणींना सामोरे जावे लागत आहे.तसेच सदर विषयात मंत्री गिरीश महाजन व कृषी मंत्री धनंजय मुंडे यांची भेट घेऊन लवकरच शेतकऱ्याची ही अडचण दूर करू असे अमोल शिंदे यांनी बोलताना सांगितले.
यांची होती उपस्थिती –
याप्रसंगी भारतीय जनता पार्टीचे भडगाव तालुकाध्यक्ष सोमनाथ पाटील, जिल्हा उपाध्यक्ष प्रदीप पाटील, पंचायत समितीचे माजी सभापती व सरचिटणीस बन्सीलाल पाटील, युवा मोर्चा जिल्हा सरचिटणीस प्रदीप सोमवंशी, विधानसभा क्षेत्र प्रमुख संजय पाटील, किसान मोर्चाचे तालुकाध्यक्ष विजय महाजन, आदी पदाधिकारी उपस्थित होते.
हेही वाचा : लोकसभा निवडणुकीत तिकिट कापले अन् विधानपरिषदेत शिवसेनेतील ‘या’ दोघांना मिळाली उमेदवारी, शिंदेंनी शब्द पाळला
