शेंदुर्णी (जामनेर), 31 जुलै: जामनेर तालुक्यातील शेंदुर्णी येथील श्रीकृष्ण माध्यमिक विद्यालयात इयत्ता आठवी ते दहावीच्या विद्यार्थ्यांसाठी सायबर सुरक्षा जनजागृती विषयावरील विशेष मार्गदर्शन सत्र उत्साहात पार पडले. गुरुवारी (दि. ३० जुलै) सकाळी ७ ते ८ या वेळेत आयोजित करण्यात आलेल्या या सत्रात सुमारे २५० विद्यार्थ्यांनी सहभाग घेतला. या मार्गदर्शन सत्रात प्रियदर्शनी भांडारकर व खुशबू लांबोळे यांनी विद्यार्थ्यांना सायबर सुरक्षेचे महत्त्व आणि डिजिटल माध्यमांचा सुरक्षित वापर याबाबत सविस्तर माहिती दिली.
ऑनलाइन फसवणूक, फिशिंग, विशिंग, स्मिशिंग, ओटीपी व पासवर्डची सुरक्षितता, मजबूत पासवर्ड तयार करण्याचे महत्त्व, द्विस्तरीय प्रमाणीकरण (2-Factor Authentication), सोशल मीडियाचा जबाबदारीने वापर, बनावट लिंक व क्यूआर कोड स्कॅम ओळखणे, सायबर बुलिंग, डिजिटल गोपनीयता, अज्ञात व्यक्तींशी ऑनलाइन संपर्क टाळणे तसेच मोबाईल अॅप्स डाउनलोड करताना घ्यावयाची काळजी आदी विषयांवर त्यांनी विद्यार्थ्यांना मार्गदर्शन केले.
संवादात्मक पद्धतीने आयोजित करण्यात आलेल्या या सत्राला विद्यार्थ्यांचा उत्स्फूर्त प्रतिसाद लाभला. विद्यार्थ्यांनी सायबर सुरक्षेसंदर्भातील विविध प्रश्न विचारून आपल्या शंकांचे निरसन करून घेतले. तसेच सुरक्षित डिजिटल जीवनशैली अंगीकारण्याचा संकल्पही यावेळी विद्यार्थ्यांनी केला. या कार्यक्रमासाठी श्रीकृष्ण माध्यमिक विद्यालयाच्या मुख्याध्यापिका मीराबाई इंगळे यांचे मार्गदर्शन लाभले. तसेच विद्यालयातील शिक्षक व शिक्षकेतर कर्मचाऱ्यांनी कार्यक्रमाच्या यशस्वी आयोजनासाठी मोलाचे सहकार्य केले.
हेही वाचा: Jalgaon Rain: जळगाव जिल्ह्यात पावसाचा कहर; कुठे काय घडलं? वाचा सविस्तर अपडेट
