पाचोरा, 8 जुलै: पंतप्रधान आवास योजना (ग्रामीण) टप्पा १ व टप्पा २ अंतर्गत मंजूर झालेल्या तसेच अपूर्ण अवस्थेतील घरकुलांची कामे तातडीने पूर्ण करण्यासाठी ग्रामपंचायत अधिकाऱ्यांनी सक्रिय भूमिका घ्यावी. लाभार्थ्यांशी सातत्याने संपर्क ठेवून त्यांना घरकुलांचे बांधकाम सुरू करण्यासाठी प्रोत्साहित करावे. या कामात दिरंगाई, टाळाटाळ अथवा दुर्लक्ष करणाऱ्या ग्रामपंचायत अधिकाऱ्यांवर थेट कारवाई करण्यात येईल, असा स्पष्ट इशारा जिल्हा परिषदेच्या मुख्य कार्यकारी अधिकारी करिश्मा नायर यांनी दिला.
सीईओंकडून घरकुल योजनेबाबत आढावा –
बुधवार (दि. ८ जुलै) रोजी पाचोरा पंचायत समितीच्या सभागृहात पाचोरा तालुक्यातील ग्रामपंचायत अधिकारी व ग्रामीण गृहनिर्माण अधिकाऱ्यांची आढावा बैठक आयोजित करण्यात आली होती. यावेळी जिल्हा ग्रामीण विकास यंत्रणेचे प्रकल्प संचालक आर. एस. लोखंडे, गटविकास अधिकारी एस. एस. मुंडे यांच्यासह संबंधित अधिकारी उपस्थित होते.
बैठकीत पाचोरा तालुक्यातील गावनिहाय मंजूर, पूर्ण व अपूर्ण घरकुलांचा सविस्तर आढावा घेण्यात आला. पहिला व दुसरा हप्ता वितरित होऊनही अद्याप पूर्ण न झालेल्या घरकुलांची कारणमीमांसा करण्यात आली. तसेच घरकुलासाठी जागा उपलब्ध करून देऊनही अतिक्रमण, स्थानिक अडचणी अथवा इतर कारणांमुळे रखडलेल्या प्रकरणांचाही मुख्य कार्यकारी अधिकारी करिश्मा नायर यांनी स्वतः आढावा घेतला.
यावेळी त्यांनी ग्रामपंचायत अधिकाऱ्यांना प्रत्येक प्रकरणावर वैयक्तिक लक्ष केंद्रित करून लाभार्थ्यांशी समन्वय साधण्याच्या सूचना दिल्या. स्थानिक प्रशासन, महसूल विभाग व संबंधित यंत्रणांच्या समन्वयातून अडथळे दूर करून घरकुलांची कामे तातडीने सुरू करण्याचे आदेश त्यांनी दिले.
…तर संबंधित ग्रामपंचायत अधिकाऱ्यांवर थेट प्रशासकीय कारवाई! –
घरकुलांच्या कामांमध्ये कोणत्याही प्रकारची दिरंगाई किंवा निष्काळजीपणा सहन केला जाणार नाही. प्रगतीबाबत नियमित आढावा घेण्यात येणार असून कामात हलगर्जीपणा करणाऱ्या संबंधित ग्रामपंचायत अधिकाऱ्यांवर थेट प्रशासकीय कारवाई करण्यात येईल, असेही मुख्य कार्यकारी अधिकारी करिश्मा नायर यांनी स्पष्ट केले.
