धरणगाव, 15 मे: जळगाव जिल्ह्यात अवैधरित्या घातक शस्त्रे व अग्नीशस्त्रे बाळगणाऱ्यांविरोधात सुरू असलेल्या मोहिमेत धरणगाव पोलिसांनी मोठी कारवाई करत एका आरोपीला गावठी बनावटीच्या पिस्टलसह अटक केली आहे. आरोपीकडून २५ हजार रुपये किमतीचे मॅगझीनसह गावठी पिस्टल जप्त करण्यात आले आहे.
काय आहे संपुर्ण बातमी? –
पोलीस अधीक्षक श्रीकांत धिवरे यांनी जिल्ह्यातील सर्व पोलीस स्टेशन प्रभारी अधिकाऱ्यांना अवैध शस्त्रास्त्र बाळगणाऱ्या इसमांविरुद्ध कठोर कारवाई करण्याच्या सूचना दिल्या होत्या. त्यानुसार, धरणगाव पोलीस स्टेशनचे प्रभारी अधिकारी सुनिल पवार यांनी अधिकारी व कर्मचाऱ्यांना गोपनीय माहितीच्या आधारे कारवाईचे आदेश दिले होते.
पाळधी पोलीस दूरक्षेत्राचे सहायक पोलीस निरीक्षक भूषण कोते दि. १४ मे २०२६ रोजी दुपारी साडेदोन वाजण्याच्या सुमारास हे आपल्या पथकासह दोनगाव (ता. धरणगाव) येथील गिरणा नदीपात्रात अवैध रेती वाहतुकीस प्रतिबंध करण्यासाठी पेट्रोलिंग करत होते. यावेळी एक संशयित इसम नदीपात्रात फिरताना आढळून आला. त्याच्याकडे चौकशी केली असता समाधानकारक उत्तरे मिळाली नाहीत. हालचाली संशयास्पद वाटल्याने पोलिसांनी त्याची अंगझडती घेतली असता त्याच्याकडून मॅगझीनसह गावठी बनावटीचे पिस्टल आढळून आले.
या प्रकरणी आनंदा बळीराम सपकाळे (वय ३९, रा. आव्हाणे ता. जळगाव) याच्याविरुद्ध धरणगाव पोलीस स्टेशन येथे गुन्हा रजिस्टर क्रमांक १८७/२०२६ अन्वये भारतीय हत्यार कायदा कलम ३/२५ प्रमाणे गुन्हा दाखल करण्यात आला आहे. या गुन्ह्याचा पुढील तपास पोलीस उपनिरीक्षक दत्तात्रय बडगुजर करीत आहेत.
सदरची कारवाई अपर पोलीस अधीक्षक कविता नेरकर तसेच उपविभागीय पोलीस अधिकारी आण्णासाहेब घोलप यांच्या मार्गदर्शनाखाली पोलीस निरीक्षक सुनिल पवार यांच्या नेतृत्वाखाली सहायक पोलीस निरीक्षक भूषण कोते, पोलीस उपनिरीक्षक दत्तात्रय बडगुजर, पो. कॉ. ज्ञानेश्वर बाविस्कर, पो. कॉ. रविंद्र चौधरी, पो. कॉ. विशाल पाटील, सर्व नेमणूक धरणगाव पोलीस स्टेशन यांच्या पथकाने उत्कृष्ट व उल्लेखनीय कामगिरी केली आहे.
हेही वाचा: Chopda News: चौगाव किल्ला रस्त्याची दुर्दशा; पावसाळ्यापुर्वी दुरूस्तीची मागणी
