शिंदखेडा (धुळे) : आगामी काळापासून आता शिंदखेडा पंचायत समितीच्या आवारात उपोषण, आमरण उपोषण, आंदोलन करता येणार नाही. आवारात इतर कामांसाठी त्यांचा अडथळा निर्माण होतो. त्यामुळे यापुढे येथील आवारात आंदोलन केल्यास पोलीस कारवाई करण्यात येईल, असे दोन फलक आवारात दर्शनी भागात लावण्यात आले आहेत. तसेच शिंदखेडा तहसीलदार, पोलीस ठाणे आणि नगरपंचायत यांना गटविकास अधिकारी आर. डी. वाघ यांनी याबाबतचे पत्रही दिले आहे.
काय आहे पत्रात –
गटविकास अधिकारी आर. डी. वाघ दिलेल्या पत्रात म्हटले आहे की, केंद्र शासनामार्फत अथवा महाराष्ट्र शासनामार्फत जनसामान्यांच्या विकासासाठी, पात्र लाभार्थ्यांसाठी पंचायत समितीमार्फत विविध कल्याणकारी योजना राबविण्यात येतात. या योजना राबविताना कार्यालयास काही तांत्रिक अडचणी येतात. तसेच सदरील योजनांचा लाभ न मिळाल्यास काही लाभार्थ्यांकडून अथवा तालुक्यातील जनप्रतिनिधीकडून पंचायत समिती आवारातच वेळोवेळी उपोषण, आमरण उपोषण अथवा आंदोलन करण्याची धमकी देण्यात येते किंवा त्याप्रमाणे उपोषण, आमरण उपोषण अथवा आंदोलन करण्यात येते.
पंचायत समिती व पंचायत समितीचे संपूर्ण आवार हे पूर्णपणे शासकीय मालमत्ता आहे. त्यामुळे सदरील मालमत्तेस नुकसान अथवा हानी पोहोचू नये यासाठी उपोषणकर्ते अथवा आंदोलनकर्ते यांना पंचायत समितीच्या आवाराबाहेर जागा निश्चिती करून द्यावी. त्यानुसार जागा निश्चितीनंतरदेखील कोणी उपोषणकर्ते अथवा आंदालनकर्ते पंचायत समितीच्या आवारात उपोषणास अथवा आंदोलनास बसल्यास त्यांच्याविरुद्ध आपल्या स्तरावरून योग्य ती प्रशासकीय कारवाई करण्यात यावी, असे पत्रात म्हटले आहे. तसेच या अगोदर बी. सरवण (भाप्रसे) गटविकास अधिकारी शिंदखेडा यांनीही 9 डिसेंबर 2024 ला यासंदर्भात पत्र दिले होते.
त्यामुळे आता यापुढे आगामी काळापासून आता शिंदखेडा पंचायत समितीच्या आवारात उपोषण, आमरण उपोषण, आंदोलन करता येणार नाही. आवारात इतर कामांसाठी त्यांचा अडथळा निर्माण होतो. त्यामुळे यापुढे येथील आवारात आंदोलन केल्यास पोलीस कारवाई करण्यात येईल.
हेही वाचा – Dhule News : शिक्षकाला ब्लॅकमेल केलेल्या ‘त्या’ तरुणीची कारागृहात आत्महत्या, धुळ्यातील धक्कादायक घटना
