मुंबई, 3 फेब्रुवारी : राज्यातील उच्च शिक्षण घेणाऱ्या मुलींसाठी महत्वाची बातमी समोर आली आहे. 8 लाख किंवा त्यापेक्षाही कमी उत्पन्न गटातील कुटुंबातील विद्यार्थीनींना उच्च शिक्षणात पूर्ण शुल्क माफी देण्याचा निर्णय राज्य सरकारने घेतला आहे. राज्याचे उच्च व तंत्रशिक्षणमंत्री चंद्रकांत पाटील यांनी याबाबतची घोषणा केली.
काय आहे संपूर्ण बातमी? –
राज्याचे उच्च व तंत्रशिक्षणमंत्री चंद्रकांत पाटील यांनी कुलगुरुंच्या बैठकीत शुक्रवारी याची घोषणा केली. सध्या 8 लाख किंवा त्यापेक्षाही कमी उत्पन्न गटातील कुटुंबातील मुलींना शैक्षणिक वर्षात 50 टक्के शुल्क माफी होती. आता ही शुक्लमाफी 100 टक्क्यांपर्यंत वाढवण्यात आली आहे. यामध्ये पूर्ण शैक्षणिक वर्षासाठी मुलींच्या शुल्कात माफी देण्यात येणार असून महाराष्ट्र सरकार शैक्षणिक संस्थाना या खर्चाची परतफेड करेल.
प्रवेश संख्या वाढण्याची शक्यता –
कुलगुरूंच्या बैठकीत मंत्री चंद्रकांत पाटील पुढे म्हणाले की, सरकारच्या या निर्णयामुळे उच्च शिक्षण घेऊ इच्छिणाऱ्या मुलींना याचा फायदा होणार आहे. यामुळे मुलींची विद्यापीठातील प्रवेश संख्या वाढण्याची शक्यता आहे. उच्च शिक्षणातील विविध कोर्सेससाठी मोठ्या संख्येने मुलींनी प्रवेश घ्यावा. यासाठी विद्यापीठांनी प्रयत्न करायला पाहिजे. तसेच कुलगुरुंनी वेळेवर निकाल लागावा, यासाठी प्रयत्न केले पाहिजेत. यावेळी कुलगुरुंच्या बैठकीला राज्यपाल रमेश बैस हे देखील उपस्थित होते.
हेही वाचा : मोठी बातमी! भाजपचे ज्येष्ठ नेते लालकृष्ण अडवाणी यांना ‘भारतरत्न’ पुरस्कार जाहीर
