जळगाव, 29 एप्रिल: मोठ्या परताव्याचे आमिष दाखवून 5 लाखांहून अधिक रकमेची फसवणूक केल्याप्रकरणी जळगावच्या स्थानिक गुन्हे शाखेने तीन आरोपींना ताब्यात घेतले आहे. ही कारवाई करमाडा (जि. छत्रपती संभाजीनगर) येथे करण्यात आली.
काय आहे संपुर्ण बातमी? –
याबाबत मिळालेल्या माहितीनुसार, दि. २७ एप्रिल २०२६ रोजी दुपारी साडेबारा वाजण्याच्या सुमारास धानोरा (ता. चोपडा, जि. जळगाव) येथील जगदीश शंकर व्यास यांना एका अज्ञात व्यक्तीने मोबाईलद्वारे संपर्क साधून १ लाख रुपये गुंतवल्यास ५ लाख परतावा देण्याचे आमिष दाखवले. त्यानंतर संबंधित इसमाने हॉटेल कमल पॅराडाईज येथे बोलावून पैशांची चौकशी केली.
दरम्यान, या आमिषाला बळी पडून व्यास यांनी आपल्या मुलगा पंकज व्यास याला ५ लाख २० हजार रुपये घेऊन त्या ठिकाणी बोलावले. पंकज व्यास कारने तेथे पोहोचताच आरोपी व त्याचे दोन साथीदार त्याच्या कारमध्ये बसले. ‘येथे चेकिंग सुरू आहे’ असे सांगून त्यांनी भुसावळकडे जाण्याचा बहाणा केला. काही वेळातच पंकज व्यास एकटाच परत आला असता, आरोपींनी त्याच्याकडील संपूर्ण रक्कम घेऊन पळ काढल्याचे उघड झाले.
या प्रकरणी शनिपेठ पोलीस ठाण्यात गुन्हा दाखल करण्यात आला होता. पोलीस अधीक्षक श्रीकांत धिवरे यांच्या मार्गदर्शनाखाली स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांनी तपास पथक तयार करून तपास सुरू केला. दरम्यान, आरोपी करमाडा येथे एकता हॉटेलजवळ असल्याची माहिती मिळताच पथकाने सापळा रचून प्रकाश लक्ष्मण शिंदे (वय ४०), स्वप्नील दिलीप दळवी (वय ३३) व भागवत दत्ताराव कष्टे (वय ४०) यांना ताब्यात घेतले.
विशेष म्हणजे, भागवत कष्टे हा वाशिम पोलीस मुख्यालयात कार्यरत पोलीस कर्मचारी असल्याचे समोर आले आहे. चौकशीदरम्यान आरोपींनी इतर साथीदारांच्या मदतीने गुन्हा केल्याची कबुली दिली असून, त्यांना पुढील कारवाईसाठी शनिपेठ पोलीस ठाण्याच्या ताब्यात देण्यात आले आहे. या प्रकरणाचा पुढील तपास सहाय्यक पोलीस निरीक्षक साजिद मन्सुरी करीत आहेत.
यांनी केली कारवाई –
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत, तसेच उपविभागीय पोलीस अधिकारी नितीन गणापुरे यांच्या मार्गदर्शनाखाली वरिष्ठ पोलीस निरीक्षक राहुल गायकवाड, पोलीस उपनिरीक्षक शरद वागल, सहायक फौजदार अतुल वंजारी, पोहेकॉ प्रविण भालेराव, मुरलीधर धनगर, विजय पाटील, नितीन बाविस्कर, अक्रम शेख, किशोर पाटील, राहुल रगडे, रविंद्र कापडणे, छगन तायडे, प्रविण हिवराळे यांच्यासह तांत्रिक मदतीसाठी गौरव पाटील, मिलिंद जाधव, ईश्वर पाटील, प्रदीप सपकाळे यांनी केली.
