जळगाव, 8 ऑगस्ट: शहरातील भवानीपेठ परिसरातील दुकानातून चोरीला गेलेल्या तीन वेल्डिंग मशिन आणि 16 ग्राईंडर मशिनच्या बॉक्सच्या चोरीचा शनिपेठ पोलिसांनी अवघ्या 24 तासांत छडा लावला. पोलिसांनी एका संशयिताला ताब्यात घेत त्याच्याकडून सुमारे 52 हजार 800 रुपये किमतीचा मुद्देमाल हस्तगत केला आहे.
भवानीपेठ येथील नोबल मार्केटिंग अँड मीडिया सोल्युशन या दुकानातून 3 ऑगस्ट रोजी तीन वेल्डिंग मशिनचे बॉक्स आणि 16 ग्राईंडर मशिनचे बॉक्स अज्ञात चोरट्याने चोरून नेले होते. याप्रकरणी 6 ऑगस्ट रोजी शनिपेठ पोलीस ठाण्यात गुन्हा क्रमांक 162/2026, भारतीय न्याय संहिता कलम 303(2) अन्वये गुन्हा दाखल करण्यात आला होता.
गुन्ह्याचा तपास पोलीस निरीक्षक विशाल जयस्वाल यांनी हाती घेतला. त्यांनी शनिपेठ पोलीस ठाण्याच्या डीबी पथकाला घटनास्थळी जाऊन परिसरातील सीसीटीव्ही फुटेज तपासण्यासह दुकानातील कर्मचाऱ्यांकडे चौकशी करण्याच्या सूचना दिल्या.
त्यानुसार पोलिसांनी घटनास्थळ व परिसरातील उपलब्ध सीसीटीव्ही फुटेज तपासले. तसेच गोपनीय माहिती आणि तांत्रिक तपासाच्या आधारे वसिम शेख हसन (वय 29, रा. मरिमाता मंदिराजवळ, भिरपुला, जळगाव) याला ताब्यात घेतले. चौकशीदरम्यान त्याच्याकडून चोरी केल्याची कबुली मिळाल्याचे पोलिसांनी सांगितले.
पोलिसांनी आरोपीच्या ताब्यातून तीन वेल्डिंग मशिनचे बॉक्स आणि 16 ग्राईंडर मशिनचे बॉक्स, असा एकूण 52,800 रुपये किमतीचा मुद्देमाल हस्तगत केला आहे. या प्रकरणाचा पुढील तपास पोलीस हेड कॉन्स्टेबल विजय खैरे करीत आहेत.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी नितीन गणापुर यांच्या मार्गदर्शनाखाली पोलीस निरीक्षक विशाल जयस्वाल, परिविक्षाधीन पोलीस उपनिरीक्षक संतोष खेडकर, परिविक्षाधीन पोलीस उपनिरीक्षक अभिषेक कटारे तसेच पोलीस अंमलदार योगेश जाधव, विजय खैरे, अमोल वंजारी, पराग दुसाने, निलेश घुगे, नवजित चौधरी, गणेश ढाकणे आणि योगेश साबळे यांच्या पथकाने केली.
