संदीप पाटील, प्रतिनिधी
पारोळा, 23 मे : शेतकऱ्यांसाठी बी बियाणे खते खरेदी करण्याची वेळ असून पारोळा, भडगाव, एरंडोल, पाचोरा, सोयगाव, चाळीसगाव, धरणगाव, अमळनेर, यासह जिल्ह्यामध्ये मोठ्या प्रमाणात शासकीय किमतीपेक्षा अव्वाच्या सव्वा किमतीने कापुस व ईतर बी बियाणे खते विक्री करण्याचा तसेच लिंकींग करण्याचा गोरख धंदा कृषी केंद्र संचालक करत असल्याचा आरोप महाराष्ट्र शेतकरी संघटनेने केला आहे.
शेतकऱ्यांना लुटण्याचा कारभार? –
तसेच बी-बियाणे उपलब्ध असूनही त्याचा तुटवडा दाखवला जात आहे. खते मिळणार नाहीत अशी अफवा पसरवत कृत्रिम तुटवडा करून शेतकऱ्यांना लुटण्याचा कारभार कृषी केंद्र चालकांकडून केला जात असल्याचाही आरोप महाराष्ट्र शेतकरी संघटनेने केला आहे.
तहसीलदार व कृषी अधिकारी यांना निवेदन देणार –
शेतकऱ्यांच्या होणाऱ्या लुटीकडे शासनाच्या प्रतिनिधींचे कुठलेही नियंत्रण असल्याचे दिसून येत नाही. त्यामुळे महाराष्ट्र शेतकरी संघटनेच्या माध्यमाने दिनांक 24 मे 2024 रोजी सकाळी अकरा वाजता तहसीलदार व कृषी अधिकारी यांना निवेदन देण्यात येणार आहे यासाठी मोठ्या संख्येने शेतकऱ्यांनी उपस्थित राहावे आहे, असे आवाहन संघटनेचे संस्थापक तथा राष्ट्रीय अध्यक्ष सुनील प्रकाश देवरे यांनी केले आहे.
पारोळा शहरातील कजगाव रोडवरी संघटनेचे मुख्य संपर्क कार्यालय येथे उद्या सकाळी दहा वाजता उपस्थित राहण्याचे आवाहन देखील देवरे यांनी केले आहे.
हेही वाचा : Murder in Jalgaon : जळगावात तरूणाची हत्या, जुन्या वादातून घडली जिल्ह्याला हादरवणारी घटना
