जळगाव, 28 जानेवारी : जळगाव जिल्हा नियोजन समितीची बैठक जिल्हा नियोजन समितीच्या सभागृहात काल 27 जानेवारी रोजी आयोजित करण्यात आली होती. बैठकीपुर्वी, शासकीय विश्रामगृहात पालकमंत्री गुलाबराव पाटील आणि माजी मंत्री तथा राष्ट्रवादी शरद पवार गटाचे जेष्ठ नेते एकनाथराव खडसे यांनी एकत्र जेवण केले. एकमेकांचे कट्टर राजकीय विरोधक मानल्या जाणाऱ्या या दोन्ही नेते चक्क एकत्र जेवण करत असल्याचे पाहायला मिळाल्याने राजकीय चर्चांना उधाण आले.
मंत्री गुलाबराव पाटील यांची प्रतिक्रिया –
मंत्री गुलाबराव पाटील यांनी याबाबत माध्यमांसोबत बोलताना सांगितले की, जिल्हाधिकाऱ्यांच्यावतीने सर्व आमदारांना जेवण देण्यात आले होते. यामुळे एकनाथराव खडसे हे देखील विधानपरिषदेचे आमदार असल्याने ते देखील त्याठिकाणी आले होते. दरम्यान, जेवणाच्यावेळी बंद दाराआड काही चर्चा झाली का असा प्रश्न पत्रकारांनी उपस्थित केला असता त्यावर गुलाबराव पाटील यांनी सांगितले की, जळगाव जिल्ह्याच्या नियोजन समितीच्या बैठकीबाबत प्राथमिक चर्चा झाली. तसेच जळगाव जिल्ह्यासाठी काय करता येईल, याबाबतही बोलणं झाले.
एकनाथ खडसे-गुलाबराव पाटलांची चर्चा –
एकनाथ खडसे यांनी अजिंठा शासकीय विश्रामगृहात पालकमंत्री गुलाबराव पाटील यांची अँटी चेंबरमध्ये भेट घेतली असता दोन्ही नेत्यांमध्ये अर्धा तास चर्चा देखील झाली. त्यानंतर, या ठिकाणी शिवसेनेचे जिल्हाप्रमुख विष्णू भंगाळे, आमदार सुरेश भोळे यांच्यासह इतर नेते मंडळी दाखल झाली. दरम्यान, सर्वांनी एकत्र भोजनाचा आस्वाद घेतला. यानंतर गुलाबराव पाटील आणि एकनाथ खडसे यांच्या झालेल्या भेटीमुळे राजकीय चर्चांना उधाण आले.
