ईसा तडवी, प्रतिनिधी
पाचोरा, 2 मे : महाराष्ट्र दिनानिमित्त पाचोरा शहरातील नगरपरिषदेच्या महात्मा गांधी सार्वजनिक वाचनालयात इ-लायब्ररी कक्षाचे आमदार किशोर आप्पा पाटील यांच्या हस्ते उद्घाटन करण्यात आले. स्पर्धा परिक्षांच्या तयारीसाठी या इ-लायब्ररी कक्षाची निर्मिती केली असून पाचोरा शहरासह मध्यमवर्गीय कुटुंबियांतील विद्यार्थ्यांना याचा लाभ घेता येणार आहे.
इ-लायब्ररी कक्ष मध्ये विद्यार्थ्यांसाठी 7 कॉम्प्युटर आणि 3 टॅब उपलब्ध आहेत. तसेच, स्पर्धा परीक्षांसाठी अत्यंत लोकप्रिय असलेले ऑनलाइन क्लासेस (Recorded Lectures) चे subscriptions घेतले आहेत, जे विद्यार्थ्यांना मोफत उपलब्ध असणार आहेत. दरम्यान, मध्यमवर्गीय कुटुंबियांतील विद्यार्थ्यांना याचा मोठ्या प्रमाणात फायदा होणार असल्याचे पाचोरा नगरपरिषदेचे मुख्याधिकारी मंगेश देवरे यांनी सांगितले.
यावेळी तहसिलदार विजय बनसोडे, नायब तहसिलदार विनोद कुमावत, माजी नगराध्यक्ष संजय गोहिल, भाजपचे उपजिल्हाध्यक्ष तथा माजी जि.प. सदस्य मधूकर काटे, शिवनेसेचे रावसाहेब पाटील, आमदार किशोर आप्पा पाटील यांचे स्वीय सहायक राजेश पाटील, प्रविण ब्राम्हणे, पत्रकार सुनिल पाटील यांच्यासह नगरपरिषदेचे कर्मचारी उपस्थित होते.
