पुणे : राज्यात गेल्या काही दिवसांपासून गुन्हेगारीच्या घटनांमध्ये वाढ होत आहेत. अनैतिक संबंधातून खून, आत्महत्या तसेच लैंगिक अत्याचाराच्या घटना समोर येत आहेत. यातच आता आणखी एक धक्कादायक घटना समोर आली आहे. महिला शिक्षिकेने 17 वर्षांच्या विद्यार्थ्यावर लैंगिक अत्याचार केले.
काय आहे संपूर्ण घटना –
पुण्यातील गंज पेठेतील एका शाळेत हा धक्कादायक प्रकार समोर आला आहे. याप्रकरणी महिला शिक्षिकेला पोलिसांनी अटक केली आहे. तसेच याप्रकरणी खडक पोलीस ठाण्यात संबंधित शिक्षिकेवर पॉक्‍सो कायद्यानुसार गुन्‍हा दाखल करण्यात आला आहे.
पीडित मुलगा हा भवानी पेठ परिसरातील रहिवासी आहे. तसेच तो गंज पेठेतील एका शाळेत सध्या दहावीच्या वर्गात शिक्षण घेत आहे. तर आरोपी महिलाही याच शाळेत शिक्षिका आहे. तसेच ती धानोरी येथे वास्तव्यास आहे. हा प्रकार शुक्रवारी पुण्यातील गंज पेठेत असणाऱ्या एका शाळेच्या आवारात उघडकीस आला.
बोर्डाची परीक्षा होण्यापूर्वी शाळेत पूर्व परीक्षा सुरू आहेत. या पूर्व परिक्षेसाठी तो शुक्रवारी शाळेत आला. आरोपी महिला शिक्षिकेने अल्‍पवयीन विद्यार्थ्याला आपल्या प्रेमाच्या जाळ्यात ओढले. तसेच त्‍याला तिच्‍यासोबत शाळेच्या आवारातच जबरदस्तीने शारीरिक संबंध ठेवण्यासाठी भाग पाडले.
ही बाब शाळा प्रशासनाला कळताच शाळेच्या व्‍यवस्‍थापनाने संबंधित शिक्षिकेच्या संदर्भात पोलिसात माहिती दिली. यानंतर पोलिसांनी तिला अटक केली असून तिच्यावर पोक्सो अंतर्गत गुन्हाही दाखल करण्यात आला आहे. शाळेच्या मुख्याध्यापकांच्या लक्षात ही बाब आल्यानंतर ही कारवाई झाली. दरम्यान, या घटनेने पालक वर्गाला मोठा धक्का बसला असून भीतीचे वातावरण निर्माण झाले आहे.
