जळगाव, 13 ऑगस्ट: नाशिकमध्ये होणाऱ्या कुंभमेळ्याच्या कामांच्या नावाखाली बनावट वर्क ऑर्डर तयार करून लाखो रुपयांची फसवणूक केल्याचे प्रकरण समोर आले आहे. या प्रकरणात मंत्री गिरीश महाजन यांचे दूरचे नातेवाईक तनय महाजन याला नाशिक पोलिसांनी ताब्यात घेतले आहे.
कुंभमेळा प्राधिकरणाच्या अध्यक्षांची बनावट सही करून तब्बल 70 कोटी रुपयांचे कंत्राट मिळवण्याचा प्रयत्न केल्याचा आरोप आहे. या प्रकरणी नाशिक रोड पोलीस ठाण्यात गुन्हा दाखल करण्यात आला असून, पोलिसांकडून पुढील तपास सुरू आहे.
या प्रकरणावर प्रतिक्रिया देताना मंत्री गिरीश महाजन यांनी तनय महाजन हा आपला फार दूरचा नातेवाईक असल्याचे सांगितले. तसेच, तनयवर यापूर्वीही काही गुन्हे दाखल असल्याचे त्यांनी म्हटले. या प्रकरणात नातेवाईक असो किंवा इतर कोणीही, दोषी आढळल्यास कोणाचीही गय केली जाणार नाही, असे महाजन यांनी स्पष्ट केले.
मंत्री महाजन यांनी सांगितले की, या प्रकरणात तनयपेक्षा मोठी काही नावे समोर येण्याची शक्यता आहे. काही जणांनी मोठ्या रकमा घेतल्याची माहितीही समोर येत आहे. त्यामुळे या प्रकरणाची सखोल चौकशी होणे गरजेचे आहे. या प्रकरणात आपण स्वतः तक्रार केली असून, दोषींवर कठोर कारवाई केली जाईल, असेही त्यांनी सांगितले.
अटक केलेल्या आरोपीचे वडिल काय म्हणाले? –
तनयचे वडील अनंत महाजन यांनीही या प्रकरणावर प्रतिक्रिया दिली. गावातील लोकांकडून तनयला पोलिसांनी अटक केल्याची माहिती मिळाल्याचे त्यांनी सांगितले. तनय शहरात हार्डवेअरचे दुकान चालवत होता; मात्र गेल्या वर्षभरापासून तो दुकानात बसत नसल्याने दुकान बंद करण्यात आले होते, असे त्यांनी सांगितले.
या घटनेमुळे आपल्याला मोठा धक्का बसला असून समाजात बदनामी सहन करावी लागत आहे, असे अनंत महाजन यांनी म्हटले. तनय कोणाची फसवणूक करेल, असे आपल्याला वाटत नाही. मात्र, त्याने चुकीचे कृत्य केले असेल तर त्याला कायद्यानुसार शिक्षा झाली पाहिजे, अशी भूमिकाही त्यांनी व्यक्त केली.
या प्रकरणात सध्या दोन जणांना अटक करण्यात आली असून मुख्य आरोपीसह आणखी काही संशयितांचा पोलिसांकडून शोध सुरू आहे.
हेही वाचा: भरती परीक्षा पद्धती सुधारणांसाठी राज्यात उच्चस्तरीय समिती – मुख्यमंत्री देवेंद्र फडणवीस
