सुनिल माळी, प्रतिनिधी
पारोळा, 26 ऑगस्ट : आरोग्य विभागांच्या गटप्रवर्तकाच्या मानधनात चार हजार रुपयांची भरीव वाढ करण्याचा निर्णय काल झालेल्या मंत्रिमंडळ बैठकीत घेण्यात आला. दरम्यान, पारोळा-एरंडोल विधानसभा मतदारसंघाचे आमदार चिमणराव पाटील यांनी गटप्रवर्तकांच्या विविध मागण्यांसर्भात राज्याचे सार्वजनिक आरोग्य व कुटुंब कल्याणमंत्री डॉ. तानाजी सावंत यांची भेट घेत पाठपुरावा केला होता. अशातच काल झालेल्या मंत्रीमंडळाच्या बैठकीत गटप्रवर्तकांच्या मानधनात वाढ झाल्याने चिमणराव पाटील यांच्या प्रयत्नांना यश आलंय.
गटप्रवर्तकांच्या मानधनात 4 हजारांची वाढ –
आरोग्य क्षेत्रात गटप्रवर्तकांना क्षेत्रीय भेटीच्या व आशांवरील पर्यवेक्षणाच्या दृष्टीने दौरे करावे लागतात. त्यादृष्टीने त्यांना वाढीव मानधन देण्यास मान्यता देण्यात आली. हे वाढीव मानधन एप्रिल, 2024 पासून लागू करण्यास मान्यता देण्यात आली. या खर्चापोटी 17 कोटी 59 लाख रुपयांच्या वार्षिक आवर्ती खर्चास आगामी हिवाळी अधिवेशनामध्ये पुरवणी मागणीद्वारे मंजूरी घेण्यात येणार आहे.
आमदार चिमणराव पाटील यांच्या प्रयत्नांना यश –
गटप्रवर्तकांच्या मानधनात दहा हजार रुपये वाढ करणे, संपकाळातील कपात केलेले मानधन देणे व कंत्राटी कर्मचाऱ्यांमध्ये गटप्रवर्तकांचा समावेश करणे, या मागण्या मंजूर होणेबाबत मतदारसंघातील कर्मचारी महिलांनी आमदार चिमणराव पाटील यांची भेट घेतली होती. या मागणीबाबत सार्वजनिक आरोग्य व कुटुंब कल्याणमंत्री तानाजी सावंत यांची आमदार चिमणराव पाटील यांनी 3 जुलै रोजी भेट घेत या मागण्यांबाबत सविस्तर चर्चा केली होती. दरम्यान, मंत्रीमंडळाच्या बैठकीत गटप्रवर्तकांच्या मानधनात वाढ झाल्याने चिमणराव पाटील यांच्या प्रयत्नांना यश आलंय.
या पार्श्वभूमीवर गटप्रवर्तकांच्या प्रवर्तकांचा मानधनात 4 हजारांची वाढ करून त्यांचा समस्या जाणून घेऊन न्याय दिल्याबद्दल आमदार चिमणराव पाटील यांनी एकनाथराव शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार व सार्वजनिक आरोग्य व कुटुंब कल्याणमंत्री तानाजी सावंत यांचे आभार मानले आहेत.
