मुंबई, 8 डिसेंबर : महाराष्ट्र विधानसभेचे विशेष अधिवेशन सध्या सुरू आहे. या विशेष अधिवेशनात नवनिर्वाचित आमदारांचा शपथविधी पार पडत आहे. आज दुसऱ्या दिवशी 280 आमदारांनी शपथ घेतली. दरम्यान, आज नंदुरबार जिल्ह्यातील अक्कलकुवा मतदारसंघाचे शिवसेना आमदार आमश्या पाडवी यांनी हे पद व गोपनियतेची शपथ घेताना गोंधळल्याचे पाहायला मिळाले.
आमश्या पाडवी शपथेवेळी गोंधळले –
अक्कलकुव्याचे आमदार आमश्या पाडवी यांनी आज विधानसभेत आमदारकीची शपथ घेतली. यावेळी विधानसभेच हंगामी अध्यक्ष कालीदास कोळंबर यांच्या हस्ते त्यांना शपथ देण्यात आली. कालीदास कोळंबर यांच्यानंतर बोलत असताना ते गोंधळल्याचे दिसून आले. यावेळी त्यांना शपथविधीतील एकही शब्द नीट वाचता आला नाही. दरम्यान, त्यांचा शपथीचा व्हिडीओ सोशल मीडियावरही व्हायरल झाला आहे.
View this post on Instagram
आमश्या पाडवी यांचा परिचय –
अक्कलकुवा तालुक्यातील अंकुशविहीर गावच्या सरपंचपदापासून आमश्या पाडवी राजकीय कारकिर्दीला सुरुवात झाली. यानंतर 1998 पासून 2019 पर्यत 21 वर्षे अक्कलकुवा पंचायत समितीचे सदस्य राहिले आहेत. तसेच 2001 ते 2008 या कालावधीत अक्कलकुवा पंचायत समितीचे सभापती म्हणूनही त्यांनी जबाबदारी सांभाळली. दरम्यान, मागील दीड वर्षांपुर्वी त्यांना शिवसेनेकडून विधानपरिषदेवर संधी मिळाली. यानंतर 2024 च्या विधानसभा निवडणुकीत त्यांना शिवसेनेकडून उमेदवारी देण्यात आली होती.
तिरंगी लढतीत मिळवला विजय –
विधानसभा निवडणूक 2024 मध्ये अक्कलकुवा मतदारसंघात जोरदार चुरस पाहायला मिळाली. भाजपच्या माजी खासदार डॉ. हिना गावीत यांनी भाजपमधून बंडखोरी करत निवडणूक लढवली. तर दुसरीकडे अक्कलकुव्याचे विद्यमान आमदार के.सी. पाडवी हे देखील निवडणुकीच्या रिंगणात होते. दरम्यान, शिवसेनेकडून आमश्या पाडवी यांना उमेदवारी मिळाली असताना या मतदारसंघात तिरंगी लढत झाली. या तिरंगी लढतीत आमश्या पाडवी यांनी विजय मिळवला आणि आज त्यांनी सदस्यपदाची शपथ घेतली.
हेही वाचा : Video : खान्देशातील ‘या’ आमदाराने घेतली अहिराणीतून शपथ; पाहा व्हिडिओ…
