जळगाव, 7 जुलै: महाराष्ट्रभर मान्सूनने सध्या रौद्ररूप धारण केले असून राज्यातील बहुतांश भागात मुसळधार ते अतिमुसळधार पावसाचा कहर सुरू आहे. गेल्या तीन दिवसांपासून विविध जिल्ह्यांत सुरू असलेल्या संततधार पावसामुळे जनजीवन विस्कळीत झाले आहे. अनेक ठिकाणी पूरस्थिती निर्माण झाली असून नद्या, नाले दुथडी भरून वाहत आहेत. अनेक रस्त्यांवर पाणी साचल्याने वाहतुकीवर परिणाम झाला असून प्रशासनाकडून सतर्कतेचा इशारा देण्यात आला आहे.
महाराष्ट्रातील पावसाचा अंदाज –
भारतीय हवामान विभागाने (IMD) राज्यातील अनेक जिल्ह्यांसाठी मुसळधार पावसाचा इशारा दिला आहे. सातारा जिल्ह्यातील घाटमाथा आणि दुर्गम भागात ७ जुलै रोजी अतिमुसळधार पावसाची शक्यता वर्तवण्यात आली आहे. महाबळेश्वर, पाटण, वाई, सातारा आणि जावळी या तालुक्यांत गेल्या दोन दिवसांपासून जोरदार पाऊस सुरू असून डोंगराळ भागातून मोठ्या प्रमाणात पाणी वाहत आहे.
कोकणातही पावसाचा जोर कायम आहे. पालघर आणि रायगड जिल्ह्यांसाठी रेड अलर्ट जारी करण्यात आला असून येथे मुसळधार ते अतिमुसळधार पावसाची शक्यता आहे. तसेच ठाणे, मुंबई आणि रत्नागिरी येथेही जोरदार पावसाचा अंदाज असून या भागांसाठी ऑरेंज अलर्ट देण्यात आला आहे.
पश्चिम महाराष्ट्रातील पुणे घाटमाथा परिसरातही मुसळधार ते अतिमुसळधार पावसाचा रेड अलर्ट जारी करण्यात आला आहे. तर मराठवाड्यातील छत्रपती संभाजीनगर, परभणी, बीड, नांदेड, हिंगोली, लातूर, जालना आणि धाराशिव जिल्ह्यांत हलका ते मध्यम पाऊस पडण्याची शक्यता आहे. याशिवाय, विदर्भातील अकोला आणि अमरावती जिल्ह्यांत वादळी वाऱ्यांसह मुसळधार ते अतिमुसळधार पावसाचा अंदाज व्यक्त करण्यात आला असून या दोन्ही जिल्ह्यांसाठी ऑरेंज अलर्ट जारी करण्यात आला आहे.
नाशिक जिल्ह्याला आज सर्वाधिक मोठा अलर्ट –
राज्यात पावसाचा जोर कायम असून नाशिक जिल्ह्यातील त्र्यंबकेश्वर, इगतपुरी आणि आसपासच्या भागात संततधार पाऊस सुरू आहे. हवामान विभागाने आज (7 जुलै) नाशिक जिल्ह्यासाठी रेड अलर्ट जारी करत पुढील काही तासांत ढगफुटीसदृश पावसाचा इशारा दिला आहे. या पार्श्वभूमीवर जिल्हा प्रशासन सतर्क झाले असून आपत्ती व्यवस्थापन मंत्री गिरीश महाजन यांनी मध्यरात्रीच त्र्यंबकेश्वर येथील पावसाच्या परिस्थितीचा आढावा घेतला.
जळगाव जिल्ह्याचा हवामान अंदाज काय? –
जळगाव जिल्ह्यात बहुतांश भागात समाधानकारक पाऊस झाल्याचे दिसून येत आहे. या पार्श्वभूमीवर शेतीकामांना वेग आला आहे. दरम्यान, जळगाव जिल्ह्यात मंगळवारी (7 जुलै) अंशतः ढगाळ वातावरण राहून मध्यम स्वरूपाच्या पावसासह मेघगर्जनेची शक्यता आहे. तसेच ३० ते ४० किमी प्रतितास वेगाने सोसाट्याचा वारा, विजांचा कडकडाट तसेच मेघगर्जनेसह पावसाचा इशारा देण्यात आला आहे.
हेही वाचा: पावसाच्या पार्श्वभूमीवर शासकीय यंत्रणा 24 बाय 7 ‘अलर्ट मोड’वर ठेवा – मुख्यमंत्री देवेंद्र फडणवीस
