पाचोरा, 26 जून : पाचोरा शहरातील मोंढाळे रोडवरील पडक्या शाळेच्या खोलीत एका तरुण आणि तरुणीने गळफास घेऊन आपले जीवन संपवले. ही धक्कादायक घटना आज पहाटेच्या सुमारास उघडकीस आली. जितेंद्र राजु राठोड (वय -19) आणि साक्षी सोमनाथ भोई (वय-19), अशी मृतांची नावे आहेत. तरुण आणि तरुणीच्या आत्महत्येच्या या घटनेने संपूर्ण परिसरात एकच खळबळ उडाली आहे.
काय आहे संपूर्ण बातमी –
पाचोरा शहरातील मोंढाळे रोडवरील पडक्या शाळेच्या खोलीत एका तरुण आणि तरुणीने गळफास घेऊन आत्महत्या केली. घटनेची माहिती मिळताच पाचोरा पोलीस ठाण्याचे पोलीस निरीक्षक राहुल खताळ, पोलीस उपनिरीक्षक विजया वसावे, पोलीस कॉन्स्टेबल दिलीप वाघमोडे, नरेंद्र नरवाडे यांनी घटनास्थळी धाव घेतली. तसेच दोघांचे मृतदेह ताब्यात घेत शवविच्छेदनासाठी हलवले.
हेही वाचा – खान्देशकन्येची बाजी! पाचोऱ्याच्या विशाखाला साहित्य अकादमी युवा पुरस्कार 2023 जाहीर
साक्षी भोई या तरुणीचे नुकतेच लग्न झाले होते आणि लग्नानंतर ती पाचोरा येथे माहेरी आली होती. दरम्यान, मध्यरात्री तरुण विवाहिता घरात नसल्याचे लक्षात आल्यानंतर तिचा शोध सुरू झाला. यावेळी घराच्या मागील बाजूस अंगणवाडीत दोघेही जण गळफास घेतलेल्या अवस्थेत दिसून आले. यानंतर एकच खळबळ उडाली. जितेंद्र राठोड या तरुणाचा परिवार मोलमजुरी करतो तर साक्षी भोईचा परिवार मासे विक्री करून उदरनिर्वाह करतो.
जितेंद्र हा नुकताच बारावीची परीक्षा नुकतीच उत्तीर्ण झाला होता. दोघेही परिवार शहरातील एकाच भागातील रहिवासी आहेत. आत्महत्येची ही घटना प्रेमप्रकरणातून झाली असावी, अशी शक्यता वर्तवली जात आहे. मृत साक्षी भोई हिच्या पश्चात आई-वडील, भाऊ, पती तर मृत जितेंद्र राठोड याच्या पश्चात आई-वडील व तीन बहिणी असा परिवार आहे. दरम्यान, दोघांच्या मृत्यूमुळे पाचोरा शहरासह जिल्ह्यात खळबळ उडाली आहे.
