चोपडा, 14 फेब्रुवारी: चोपडा येथील ब्रह्माकुमारीज ईश्वरीय विश्वविद्यालय च्या वतीने प्रथमच २१,१११ कच्च्या केळ्यांपासून १८ फूट उंच भव्य महाशिवलिंग साकारले आहे. महाशिवरात्रीच्या पावन पर्वा निमित्त प्रजापिता ब्रह्माकुमारीज ईश्वरीय विश्वविद्यालय, चोपडा यांनी आपल्यासाठी एक अभूतपूर्व अशी आध्यात्मिक पर्वणीच घेऊन आलेले आहे.
महाशिवरात्रीचे पावन पर्व म्हणजे अंधकारातून प्रकाशाकडे नेणारा उत्सव. याच औचित्याने चोपडा शहरात यंदा प्रथमच एक अत्यंत आगळावेगळा आणि विलोभनीय उपक्रम त्यांनी साकारला आहे. प्रजापिता ब्रह्माकुमारीज ईश्वरीय विश्वविद्यालय, चोपडा यांच्या वतीने चक्क १८ फूट उंच आणि २१,१११ कच्च्या केळ्यांपासून भव्य ‘महाशिवलिंग’ साकारण्यात आले आहे. हे शिवलिंग सध्या संपूर्ण परिसरात आकर्षणाचे केंद्र ठरत असून भक्तांची मोठी गर्दी होण्याची शक्यता नाकारता येत नाही.
शिवलिंगाचे भव्य स्वरूप –
महाशिवरात्री पर्व केवळ धार्मिक विधी न राहता, अध्यात्म आणि सृजनशीलता यांचा संगम या उपक्रमात दिसून येत असतो. तब्बल १८ फूट उंचीचे हे शिवलिंग पर्यावरणपूरक पद्धतीने तयार करण्यात आले आहे.
केळ्यांची सजावट –
महाशिवलंग उभारण्यासाठी एकूण २१,१११ कच्च्या केळ्यांचा वापर करण्याता आला असून हे शिवलिंग अत्यंत सुबकपणे मढवण्यात आले आहे. सदर पर्यावरणपूरक आणि भव्य दिव्य अशा या महाशिवलिंगाचे दर्शन घेण्यासाठी चोपडा शहरासह तालुक्यातील भाविकांमध्ये मोठी उत्सुकता दिसून येत आहे. दर्शनाचे नियोजन ब्रह्माकुमारीज, चोपडा यांनी केले आहे. केवळ दर्शनच नव्हे, तर मानवी जीवनात आत्मचिंतन, संयम आणि पवित्रता यावी, हा यामागील मुख्य उद्देश आहे.
आध्यात्मिक चित्रप्रदर्शनी –
महाशिवलिंगासोबतच येथे एक आध्यात्मिक चित्रप्रदर्शनी देखील भरवण्यात आली आहे. या माध्यमातून ‘शिवतत्त्व’, ‘आत्मा-परमात्मा नाते’ आणि ‘सदाचारयुक्त जीवन’ या विषयांवर मार्गदर्शन केले जाणार आहे. अज्ञानाचा अंधकार दूर करून ज्ञानाचा प्रकाश पसरवण्याचा संदेश या प्रदर्शनातून दिला जाईल.
”हा उपक्रम भाविकांसाठी केवळ दर्शनाचा विषय नसून तो आध्यात्मिक ऊर्जा आणि प्रेरणेचा स्रोत ठरणार आहे. नागरिकांनी सहपरिवार उपस्थित राहून या दिव्य दर्शनाचा आणि संदेशाचा लाभ घ्यावा.” असे आवाहन आयोजक, ब्रह्माकुमारीज, चोपडा यांनी केले आहे.
