अडावद (चोपडा), 20 जून: यावल मतदारसंघाचे आमदार अमोल जावळे यांच्या वाढदिवसानिमित्त अडावद येथे भारतीय जनता पक्षाच्या पदाधिकारी व कार्यकर्त्यांच्या वतीने सामाजिक बांधिलकी जपत वृक्षारोपण आणि गोसेवेचा उपक्रम उत्साहात राबविण्यात आला. अडावद येथील गोशाळेत आयोजित या कार्यक्रमातून पर्यावरण संवर्धनाचा संदेश देतानाच गोसेवेचे महत्त्वही अधोरेखित करण्यात आले.
वाढदिवस हा केवळ केक कापून किंवा औपचारिक शुभेच्छा देण्यापुरता मर्यादित न ठेवता समाजोपयोगी कार्यातून साजरा करण्याच्या उद्देशाने हा उपक्रम आयोजित करण्यात आला. यावेळी उपस्थितांनी विविध प्रकारच्या वृक्षांची लागवड करून पर्यावर संरक्षणाची सामूहिक शपथ घेतली. भविष्यात लावलेल्या प्रत्येक वृक्षाचे संगोपन करण्याचा निर्धारही कार्यकर्त्यांनी व्यक्त केला. यानंतर गोशाळेतील गाईना डेप (पौष्टिक पशुखाद्य) खाऊ घालून गोसेवा करण्यात आली.
भारतीय संस्कृतीत गाईचे असलेले धार्मिक, सामाजिक व आर्थिक महत्त्व लक्षात घेऊन हा उपक्रम राबविण्यात आल्याचे कार्यकर्त्यांनी सांगितले. उपस्थितांनी गोशाळेच्या व्यवस्थापनाचेही कौतुक केले. यावेळी आमदार अमोल जावळे यांच्या निरोगी, दीर्घायुषी व यशस्वी राजकीय वाटचालीसाठी शुभेच्छा व्यक्त करण्यात आल्या. समाजहिताचे कार्य आणि विकासाभिमुख नेतृत्व त्यांच्या हातून अधिक बळकट व्हावे, अशा भावना उपस्थितांनी व्यक्त केल्या.
या प्रसंगी माजी जिल्हा परिषद सदस्य शांताराम पाटील, भुषण पंचोली, संदीप महाजन, प्रभाकर महाजन, हनुमंत महाजन, विवेक पाटील, विजय बाविस्कर, संजय वाघ, विठ्ठल पाटील, मिलिंद वाणी, संदीप भोईट, हेमंत देवरे, बबन पाटील, विवेक गुजरे यांच्यासह भारतीय जनता पक्षाचे पदाधिकारी, कार्यकर्ते आणि ग्रामस्थ मोठ्या संख्येने उपस्थित होते.
हेही वाचा: अवैध धंद्यांविरोधात महिलांनी निर्भयपणे पुढे यावे : एपीआय कल्याणी वर्मा
