मुंबई, 5 ऑगस्ट: महाराष्ट्रातील नागरिकांच्या आरोग्याचे संरक्षण करण्यासाठी अन्न व औषध प्रशासनाने (FDA) महत्त्वाचा निर्णय घेतला आहे. राज्याचे अन्न सुरक्षा आयुक्त तुकाराम मुंढे यांनी राज्यात ‘अॅनालॉग पनीर’ (नॉन-डेअरी पनीर) विक्री, साठवणूक आणि वापरावर एक वर्षासाठी बंदी घातली आहे. यासंदर्भातील आदेश अधिकृत राजपत्रात प्रसिद्ध करण्यात आला आहे.
एफडीएच्या नियमांनुसार पनीर तयार करताना दुधातील स्निग्धांश असणे आवश्यक आहे. मात्र, काही ठिकाणी दुधाऐवजी वनस्पती तेल, वनस्पती स्निग्धांश किंवा इतर दुग्धेतर घटक वापरून पनीरसारखे उत्पादन तयार केले जाते. अशा उत्पादनाला ‘अॅनालॉग पनीर’ म्हटले जाते. हे उत्पादन ‘पनीर’ या नावाने विकणे किंवा ग्राहकांना देणे हा कायद्याने गुन्हा मानला जाणार आहे.
या निर्णयामुळे राज्यातील हॉटेल, रेस्टॉरंट, भोजनालये, क्लाऊड किचन आणि केटरर्सना अॅनालॉग पनीर वापरण्यास, साठवून ठेवण्यास किंवा ग्राहकांना सर्व्ह करण्यास मनाई करण्यात आली आहे. नियमांचे उल्लंघन करणाऱ्यांवर दंडात्मक कारवाई केली जाईल. तसेच संबंधित उत्पादनाचा साठा जप्त करून नष्टही केला जाईल.
दरम्यान, या निर्णयामुळे अस्सल पनीरवर कोणतीही बंदी आलेली नाही. अन्न सुरक्षा नियमांनुसार तयार केलेले नियमित पनीर बाजारात विक्रीस उपलब्ध राहणार आहे. ग्राहकांनी पनीर खरेदी करताना पॅकेटवरील लेबल आणि घटकांची माहिती तपासावी. ‘Analog Paneer’, ‘Non-Dairy Product’, ‘Vegetable Fat’ किंवा ‘Hydrogenated Oil’ असे उल्लेख असल्यास ते अॅनालॉग पनीर असल्याचे समजावे.
हेही वाचा: पत्नीने दिले यकृत अन् मुख्यमंत्री सहाय्यता निधीने दिला आधार; पतीला मिळाले नवे आयुष्य
