जळगाव, 2 ऑगस्ट : महाराष्ट्र शासनाने घेतलेल्या विशेष मोहिमेंतर्गत महाराष्ट्र वस्तू व सेवाकर (जीएसटी) विभागाच्या जळगाव कार्यालयातील अन्वेषण शाखेमार्फत मोठी कारवाई करण्यात आली आहे. खोटी बिले देऊन शासनाची कोट्यावधी रुपयांची फसवणूक करणाऱ्या सिमेंट व्यापाऱ्यास जळगाव विभागाच्या अन्वेषण शाखेकडून अटक करण्यात आली आहे. यामुळे व्यापारी वर्गात मोठी खळबळ उडाली आहे.
नेमकं काय प्रकरण? –
मिळालेल्या माहितीनुसार, जळगाव जिल्ह्यातील चोपडा तालुक्यातील नामदेव धनगर नावाचा व्यापारी सिमेंट व्यवसाय करत असल्याचे दाखवून त्या माध्यमातून खोटी बिले देऊन शासनाची करोडो रूपयांची फसवणूक करत असल्याचे जीएसटी विभागाच्या अन्वेषण शाखेच्या नजरेस आले होते. दरम्यान, या व्यापाऱ्यावर तब्बल दोन महिने पाळत ठेवत पुरेसे पुरावे हाती येताच नामदेव धनगर याला अटक करण्यात आली आहे.
स्वामी ट्रेडिंग कंपनी या ठिकाणी छापेमारी –
महाराष्ट्र शासनाने महसूल हानी करणाऱ्या करदात्याविरूध्द विशेष मोहिम हाती घेतली आहे. या अंतर्गत महाराष्ट्र वस्तू व सेवाकर विभागाच्या जळगाव कार्यालयातील अन्वेषण शाखेमार्फत मे. स्वामी ट्रेडिंग कंपनी या ठिकाणी छापेमारी करण्यात आली. दरम्यान, या तपासात असे लक्षात आले की, करदाते मे. स्वामी ट्रेडिंग कंपनीचे मालक नामदेव दौलत धनगर यांनी प्रत्यक्षात कुठल्याही मालाची विक्री न करता खोटी बिले देऊन बनावट कर वजावटीचा पुरवठा केला होता.
साडेबारा कोटी रूपयांची फसवणूक –
महाराष्ट्र वस्तू व सेवाकर विभागाच्या जळगाव शाखेने केलेल्या कारवाईत नामदेव दौलत धनगर याने तब्बल 65 कोटीची खोटी बिले देऊन शासनाची 12.65 कोटी रुपयांची कर महसूल हानी केल्याचे उघडकीस आले आहे. या करदात्याने महाराष्ट्र वस्तू व सेवाकर अधिनियम, 2017 च्या तरतुदीचे उल्लंघन केले असल्यामुळे नामदेव धनगर याला अटक करण्यात आली आहे. महाराष्ट्र वस्तू व सेवाकर विभागाच्या जळगाव कार्यालयातील अन्वेषण शाखेमार्फत कर चुकवेगिरीसाठी ही अटक करण्यात आली आहे. दरम्यान, नामदेव धनगरला 14 दिवसापर्यंतची न्यायालयीन कोठडी सुनावण्यात आली आहे.
हेही वाचा : धक्कादायक! इमारतीवरुन उडी मारुन MBBS च्या विद्यार्थिनीची आत्महत्या, काय आहे संपुर्ण बातमी?
