मुंबई, 5 नोव्हेंबर : महाराष्ट्राचे वरिष्ठ आयपीएस अधिकारी संजय वर्मा यांची राज्याचे नवे पोलीस महासंचालक म्हणून निवड करण्यात आली आहे. सध्या ते डीजीपी (कायदेशीर आणि तांत्रिक) या पदावर कार्यरत आहेत. निवडणूक आयोगाने रश्मी शुक्ला यांना पोलीस महासंचालक पदावरुन हटविण्याचे आदेश दिले होते. दरम्यान, आज संजय वर्मा यांची राज्याचे नवे पोलीस महासंचालक म्हणून निवड करण्यात आली असून राज्यात विधानसभा निवडणुका असल्यामुळे वर्मा तात्काळ पदभर स्वीकारणार असल्याचे समजते.
संजय वर्मा राज्याचे नवे पोलीस महासंचालक –
माजी पोलीस महासंचालक रश्मी शुक्ला ह्या विधानसभा निवडणुकीच्या पार्श्वभूमीवर वादाच्या भोवऱ्यात सापडल्या होत्या. विरोधकांनी त्यांच्यावर फोन टॅपिंगसह अनेक गंभीर आरोप केले होते. निवडणूक आयोगाने विरोधकांच्या आरोपाची दखल घेत रश्मी शुक्ला यांची राज्याच्या पोलीस महासंचालक पदावरुन हटविण्याचे आदेश दिले होते. तसेच तीन आयपीएस अधिकाऱ्यांची नावे पाठवण्याचे आदेश निवडणूक आय़ोगाने दिले होते.
निवडणूक आयोगाने तीन आयपीएस अधिकाऱ्यांची नावे पाठवण्याचे आदेश दिल्यानंतर मुंबईचे पोलीस आयुक्त विवेक फणसळकर, पोलीस सेवेतले वरिष्ठ अधिकारी संजय वर्मा आणि रितेश कुमार या तीन जणांची नावे निवडणूक आयोगाकडे पाठवण्यात आली होती. त्यामधील वरिष्ठ आयपीएस अधिकारी संजय वर्मा यांची निवड केंद्रीय निवडणूक आयोगाने केली.
कोण आहेत संजय वर्मा? –
रश्मी शुक्ला यांच्यानंतर आता राज्याच्या पोलीस दलाची सुत्रे संजय वर्मा यांच्याकडे असणार आहे. संजय वर्मा 1990 च्या बॅचचे महाराष्ट्र कॅडरचे आयपीएस अधिकारी आहेत. त्यांच्याकडे त्यांच्याकडे तीन दशकाहून अधिक काळ पोलीस सेवेत काम करण्याचा अनुभव असून सध्या ते कायदा व तांत्रिक विभागाचे संचालक म्हणून कार्यरत आहेत.
संजय वर्मा हे न्यायवैद्यक विज्ञानातील त्यांच्याकडे असलेल्या कौशल्यांसाठी ओळखले जातात. कायदा व तांत्रिक विभागाचे संचालक म्हणून काम करताना त्यांनी आतपार्यंत न्यायवैद्यक क्षेत्रातील पायाभूत सुविधांच्या विकासासाठी अनेक महत्त्वाचे निर्णय घेतले. दरम्यान, एप्रिल 2028 मध्ये ते निवृत्त होऊ शकतात.
हेही वाचा : मोठी बातमी! अखेर रश्मी शुक्ला यांना पोलीस महासंचालक पदावरुन हटवलं, नेमकं काय प्रकरण?
