जामनेर (जळगाव), 13 सप्टेंबर : काही दिवसांपूर्वी भडगाव तालुक्यात एका चिमुरडीवर अत्याचार करुन तिची हत्या केल्याच्या घटनेने संपूर्ण जळगाव जिल्हा हादरला होता. ही घटना ताजी असतानाच आता जळगाव जिल्ह्यातून आणखी एक अत्यंत संतापजनक घटना समोर आली आहे. तोंडात तंबाखू देवून बापानेच आपल्या स्वत:च्या आठ दिवसांच्या मुलीची हत्या केली आहे. जामनेर तालुक्यातील हरिअर तांडा याठिकाणी ही घटना घडली आहे.
नेमकं काय घडलं –
जळगाव जिल्ह्यातील जामनेर तालुक्यात एक संतापजनक घटना घडली. जामनेर तालुक्यातील हरिहर तांडा या गावातील व्यक्तीला आधी दोन मुली होत्या. त्यानंतर तिसरीही मुलगी जन्माला आल्याने त्याने आपल्या या आठ दिवसांच्या चिमुरडीच्या तोंडात तंबाखू देऊन तिची हत्या केली. तसेच आठ दिवसांच्या या मुलीच्या मृतदेहाची परस्पर विल्हेवाट लावली. ही धक्कादायक घटना समोर आल्यानंतर एकच खळबळ उडाली आहे आहे. याप्रकरणी पहूर पोलीस ठाण्यात खूनाचा गुन्हा दाखल करण्यात आला आहे. तसेच संशयित बापाला पोलिसांनी अटक केली आहे. गोकुळ गोटीराम जाधव (30) असे या बापाचे नाव आहे. या घटनेने संपूर्ण जिल्ह्यात मोठी खळबळ उडाली आहे.
चिमुकलीच्या मृतदेहाची लावली विल्टेवाट –
जामनेर तालुक्यातील वाकोदजवळ हरिनगर तांडा येथील रहिवासी गोकुळ जाधव याला दोन मुली आहेत. शनिवारी 2 सप्टेंबरला वाकोद प्राथमिक आरोग्य केंद्रात त्याला तिसरे अपत्य म्हणून मुलगी जन्माला आली. मात्र, गोकुळने रविवारी या नवजात जन्माला आलेल्या चिमुरडीच्या तोंडात तंबाखू दिली आणि तिला झोळीत झोपविले. यात तिचा मृत्यू झाला. तसेच रात्री फर्दापूर ते वाकोद रस्त्यावर खड्डा खोदून मृतदेहाची विल्हेवाट लावली.
अशी आली घटना समोर –
मानवतेला काळिमा फासणाऱ्या या घटनेनंतर दहा दिवसापर्यंत चिमुरडीच्या बापाने या घटनेची कुणालाही माहिती मिळू दिली नाही. आशा सेविका जन्माची नोंद घेण्यासाठी घरी गेल्यावर हा धक्कादायक प्रकार समोर आला आहे.
पोलीस अधीक्षक काय म्हणाले –
जळगाव जिल्हा पोलीस अधीक्षक एम. राजकुमार यांनी याबाबत माहिती दिली की, घटना उघडकीस आल्यानंतर पोलिसांनी तत्काळ गुन्हा दाखल करत संशयित बापाला अटक केली आहे. आज फॉरेन्सिक पथकाच्या माध्यमातून घटनास्थळी भेट देण्यात आली आहे. तसेच ज्या ठिकाणी बापाने चिमुरडीचा मृतदेहाची विल्हेवाट लावली होती, त्याठिकाणाहून मृतदेह हा ताब्यात घेण्यात आला आहे. दरम्यान, पुढील तपास सुरू असल्याची माहिती पोलीस अधीक्षक एम. राजकुमार यांनी दिली.
आरोपीने दिली कबुली –
दरम्यान, पोलिसांनी या घटनेची तातडीने गंभीर दखल घेत, गोकुळ जाधवविरुद्ध खुनाचा गुन्हा दाखल केला आणि त्याला अटक केली आहे, आधीच दोन मुली आणि त्यात तिसरीही मुलगी झाल्याच्या रागातून त्या चिमुरडीच्या तोंडात तंबाखू कोंबून तिचा जीव घेतल्याची कबुली आरोपी पिता गोकुळ जाधव याने दिली. या घटनेनंतर परिसरात एकच खळबळ उडाली आहे.
