चोपडा, 26 एप्रिल: चोपडा तालुक्यातील श्री क्षेत्र लासूर येथे मुलांच्या आध्यात्मिक व सर्वांगीण विकासासाठी २ मे ते ११ मे २०२६ दरम्यान निःशुल्क वारकरी बाल सुसंस्कार शिबिराचे आयोजन करण्यात आले आहे. आजच्या धावपळीच्या व तंत्रज्ञानप्रधान जीवनशैलीमुळे मुलांमधील संस्कारांचे महत्त्व कमी होत असल्याच्या पार्श्वभूमीवर हा उपक्रम दिशादर्शक ठरत आहे.
राष्ट्रीय कथाकार महंत प्रा. हभप डॉ. सुशिलजी महाराज विटनेरकर यांच्या मार्गदर्शनाखाली दरवर्षीप्रमाणे यंदाही हे शिबिर आयोजित करण्यात आले आहे. समस्त ग्रामस्थ व भजनी मंडळ, लासूर यांच्या पुढाकारातून आयोजित निवासी शिबिरात मुलांच्या सर्वांगीण विकासावर भर दिला जाणार आहे.
शिबिरामध्ये श्रीमद्भगवद्गीता, हरिपाठ, रामरक्षा, विष्णुसहस्रनाम, हनुमान चालीसा यांसारख्या धार्मिक ग्रंथांचे अध्ययन करण्यात येणार असून पखवाज वादन, गायन, कीर्तन प्रशिक्षण तसेच वारकरी पावल्यांचे प्रात्यक्षिक शिक्षण दिले जाणार आहे. याशिवाय योगासने व व्यक्तिमत्त्व विकासावरही विशेष मार्गदर्शन करण्यात येणार आहे.
दररोज दुपारी विद्यार्थ्यांचे कीर्तन सादरीकरण होणार असून रात्री ८.३० ते १०.३० या वेळेत विविध कीर्तनकारांचे कीर्तन आयोजित करण्यात आले आहे. २ मे रोजी हभप नरेश महाराज अंमळनेरकर, ३ मे रोजी हभप हरीश महाराज वडगावकर, ४ मे रोजी हभप बाळासाहेब महाराज अनवर्देकर, ५ मे रोजी हभप पवन महाराज लासूरकर, ६ मे रोजी हभप धीरज महाराज रुंधाटीकर, ७ मे रोजी हभप गौरव महाराज वाळकीकर, ८ मे रोजी हभप राहुल महाराज दोनगावकर, ९ मे रोजी हभप सोहम महाराज लासूरकर, १० मे रोजी हभप राज महाराज कंचनपूर यांचे कीर्तन होणार असून ११ मे रोजी महंत प्रा. डॉ. सुशिलजी महाराज यांच्या काल्याच्या व परंपरेच्या गुलाल कीर्तनाने शिबिराची सांगता होईल.
शिबिराच्या समारोप प्रसंगी मान्यवरांच्या हस्ते सहभागी विद्यार्थ्यांना प्रमाणपत्र व ट्रॉफी देऊन गौरविण्यात येणार आहे. ५ वर्षांवरील मुलांसाठी खुले असलेल्या या शिबिरात वारकरी पोशाख बंधनकारक असून मोबाईल वापरावर बंदी घालण्यात आली आहे, जेणेकरून विद्यार्थ्यांना एकाग्रतेने अध्यात्मिक शिक्षण घेता येईल.
लासूर येथील श्रीराम मंदिरात होणाऱ्या या निवासी शिबिरात दरवर्षी सुमारे २०० विद्यार्थ्यांना आध्यात्मिक शिक्षण दिले जाते. विशेष म्हणजे, शिबिरादरम्यान विद्यार्थी गावातून मधुकरी मागून त्याच अन्नाचे सेवन करतात. समाजात सुसंस्कारित व चारित्र्यसंपन्न पिढी घडविण्याच्या दृष्टीने हा उपक्रम प्रेरणादायी ठरत असून पालकांनी आपल्या पाल्यांना शिबिरात सहभागी करून घ्यावे, असे आवाहन आयोजकांनी केले आहे.
