जळगाव, 5 सप्टेंबर : जळगाव जिल्ह्यात दहशत निर्माण करण्याच्या उद्देशाने गावठी अग्नीशस्त्र बाळगणाऱ्या दोन सराईत आरोपींना स्थानिक गुन्हे शाखेच्या पथकाने सापळा रचून अटक केली आहे. चरणसिंग उखा चव्हाण (वय ३६, रा. चौडी, ता. बडवाणी, म.प्र.) आणि पंकज रतनसिंग चव्हाण (वय २५, रा. मोरझिरा, ता. मुक्ताईनगर, जि. जळगाव) अशी अटक केलेल्या आरोपींची नावे आहेत. दरम्यान, त्यांच्या ताब्यातून गावठी पिस्तूल, जिवंत काडतुसे, मोटारसायकल व मोबाईल असा 1 लाख 29 हजार रुपये किंमतीचा मुद्देमाल जप्त करण्यात आला आहे.
कशी झाली कारवाई? –
मिळालेल्या माहितीनुसार, जळगाव जिल्ह्यात अवैध शस्त्रसाठा करून काही इसम दहशत निर्माण करण्याच्या तयारीत असल्याची माहिती मिळाल्यानंतर पोलीस अधीक्षक डॉ. महेश्वर रेड्डी यांनी विशेष तपासाचे आदेश दिले. त्यानुसार वरिष्ठ पोलीस निरीक्षक राहुल गायकवाड यांच्या मार्गदर्शनाखालील पथकाला गोपनीय माहिती मिळाली की, वरणगाव शहरातील फुलगाव ब्रिज परिसरात दोन संशयित गावठी कट्ट्यासह येणार आहेत.
यानुसार पथकाने तातडीने सापळा रचला असता काळ्या-लाल रंगाच्या पल्सर मोटारसायकलवर दोन इसम संशयास्पदरीत्या दिसून आले. चौकशीअंती त्यांची नावे चरणसिंग उखा चव्हाण (वय ३६, रा. चौडी, ता. बडवाणी, म.प्र.) आणि पंकज रतनसिंग चव्हाण (वय २५, रा. मोरझिरा, ता. मुक्ताईनगर, जि. जळगाव) अशी समोर आली.
शस्त्रास्त्रांसह मुद्देमाल जप्त –
त्यांची अंगझडती घेतल्यावर त्यांच्या ताब्यातून एक गावठी पिस्तूल, दोन जिवंत काडतुसे, काळ्या-लाल रंगाची पल्सर मोटारसायकल आणि दोन मोबाईल असा अंदाजे 1 लाख 29 हजार रूपये किंमतीचा मुद्देमाल जप्त करण्यात आला. परवानगीशिवाय शस्त्रे बाळगल्याप्रकरणी वरणगाव पोलीस स्टेशनला CCTNS क्र. 194/2025, आर्म अॅक्ट 3/25 प्रमाणे गुन्हा दाखल करण्यात आला आहे.
पथकाची कामगिरी –
ही कारवाई उपनिरीक्षक सोपान गोरे, पोलीस कर्मचारी यशवंत टहाकळे, प्रेमचंद सपकाळे, प्रिंतम पाटील, श्रीकृष्ण देशमुख, बबन पाटील, रविंद्र चौधरी, सचिन घुगे आणि चापोह भरत पाटील यांनी केली. संपूर्ण कारवाईसाठी मा. डॉ. महेश्वर रेड्डी (पोलीस अधीक्षक, जळगाव), अशोक नखाते (अपर पोलीस अधीक्षक) तसेच राहुल गायकवाड (वरिष्ठ पोलीस निरीक्षक, स्थानिक गुन्हे शाखा, जळगाव) यांचे मार्गदर्शन लाभले.
हेही वाचा : Jalgaon Crime : मोटारसायकल चोरी प्रकरणी एक आरोपी अटकेत; जिल्हापेठ पोलिसांची कारवाई
