चोपडा, 1 जुलै: शहरातील गणेश कॉलनी परिसरातून हरवलेल्या सहा वर्षीय चिमुकल्याचा चोपडा शहर पोलिसांनी अवघ्या दोन तासांत शोध लावून त्याला सुखरूप कुटुंबीयांच्या स्वाधीन केले. पोलिसांच्या तत्परतेमुळे संभाव्य अनर्थ टळला असून या कार्याबद्दल पालकांनी पोलिसांचे मनःपूर्वक आभार मानले आहेत.
मिळालेल्या माहितीनुसार, बुधवार (दि. १ जुलै) रोजी सकाळी सुमारे ११ वाजण्याच्या सुमारास गणेश कॉलनी येथील रहिवासी शोभाबाई कैलास चौधरी यांनी त्यांचा नातू रुद्र संदीप चौधरी (वय ६) हा खेळत असताना हरवल्याची माहिती चोपडा शहर पोलिसांना दिली. माहिती मिळताच पोलिसांनी घटनेचे गांभीर्य ओळखून तातडीने शोधमोहीम सुरू केली.
चोपडा शहर पोलीस ठाण्याचे प्रभारी अधिकारी पोलीस निरीक्षक पवन देसले यांच्या मार्गदर्शनाखाली विविध पथके रवाना करण्यात आली. परिसरातील सीसीटीव्ही फुटेज तपासण्यात आले तसेच विविध ठिकाणी कसून शोध घेण्यात आला. अत्यंत शिताफीने आणि तांत्रिक पद्धतीने तपास करत पोलिसांनी अवघ्या दोन तासांत रुद्रचा शोध लावला.
सापडलेल्या चिमुकल्याला पोलीस ठाण्यात आणून विचारपूस करण्यात आली. त्याने स्वतःचे नाव रुद्र संदीप चौधरी असल्याचे सांगितल्यानंतर त्याच्या आजी शोभाबाई कैलास चौधरी यांच्याशी संपर्क साधण्यात आला. त्यानंतर रुद्रला त्याचे पालक, मामा आणि मामी यांच्या स्वाधीन करण्यात आले.
यावेळी रुद्रने खेळत-खेळत तो रस्ता चुकल्याने घरी जाण्याचा मार्ग सापडत नसल्याचे सांगितले. हरवलेला मुलगा सुखरूप परत मिळाल्याने कुटुंबीयांच्या डोळ्यांत आनंदाश्रू तरळले. त्यांनी चोपडा शहर पोलिसांच्या तत्परतेचे कौतुक करत मनापासून आभार व्यक्त केले.
हेही वाचा: अवैध सावकारीविरोधी कायदा आणखी कडक करणार; मंत्री बाबासाहेब पाटील यांची विधानसभेत माहिती
