नवी दिल्ली, 14 सप्टेंबर: देशभरात गणेशोत्सवाचा उत्साह शिगेला पोहोचला असून, घरोघरी लाडक्या गणरायाचे भक्तिभावाने स्वागत केले जात आहे. गणेश चतुर्थीच्या निमित्ताने पंतप्रधान नरेंद्र मोदी यांनी सोमवारी देशवासीयांना मनःपूर्वक शुभेच्छा दिल्या. भगवान गणेशाचा हा पवित्र सण प्रत्येकाच्या जीवनात नवी ऊर्जा, उत्साह आणि समृद्धी घेऊन येवो, तसेच देशाच्या निरंतर प्रगतीला बळ मिळो, अशी प्रार्थना त्यांनी केली.
पंतप्रधान मोदी यांनी ‘एक्स’वरील पोस्टद्वारे गणेशभक्तांना शुभेच्छा दिल्या. “माझ्या सर्व देशबांधवांना गणेश चतुर्थीच्या मनःपूर्वक शुभेच्छा. विघ्नहर्त्याच्या दर्शनाचा आणि पूजेचा हा पवित्र सण प्रत्येकाच्या जीवनात नवी ऊर्जा आणि नवा उत्साह निर्माण करो. त्यांच्या दैवी आशीर्वादाने सर्व कार्ये यशस्वी होवोत आणि राष्ट्र निरंतर प्रगतीच्या मार्गावर वाटचाल करत राहो, हीच माझी प्रार्थना आहे. गणपती बाप्पा मोरया!” असे त्यांनी म्हटले.
देशवासियों को गणेश चतुर्थी की अनंत शुभकामनाएं। विघ्नहर्ता के दर्शन और पूजन का यह पावन पर्व सबके जीवन में नई ऊर्जा और नए उत्साह का संचार करे। उनके दिव्य आशीर्वाद से सभी के प्रयास सफल हों और राष्ट्र निरंतर प्रगति के पथ पर आगे बढ़ता रहे, यही कामना है। गणपति बाप्पा मोरया!… pic.twitter.com/5biHnkWHJ4
— Narendra Modi (@narendramodi) September 14, 2026
यासोबतच पंतप्रधान मोदी यांनी भगवान श्री विनायकाला समर्पित संस्कृत श्लोकही आपल्या पोस्टमध्ये शेअर केला. या श्लोकातून भगवान गणेशाच्या विविध दैवी गुणांचे वर्णन करण्यात आले आहे. मोदक प्रिय असणारे, साधकांना मुक्तीचा मार्ग दाखविणारे, मस्तकावर चंद्रकोर धारण करणारे आणि भक्तांचे रक्षण करणारे विनायक यांना वंदन करण्यात आले आहे.
श्लोकाच्या माध्यमातून भगवान गणेश हे विश्वाचे रक्षक आणि अद्वितीय स्वामी असल्याचे वर्णन करण्यात आले आहे. तसेच दुष्ट शक्तींचा नाश करून भक्तांना संकटे आणि दुःखातून मुक्त करणाऱ्या विघ्नहर्त्या गणरायाला नमन करण्यात आले आहे. गणेशोत्सवाच्या पार्श्वभूमीवर पंतप्रधानांच्या या शुभेच्छांमुळे देशभरातील गणेशभक्तांना उत्सवाच्या आनंदासोबतच भक्ती आणि सकारात्मकतेचा संदेश मिळाला आहे.
