जळगाव, 11 जुलै : राज्यात दिवसेंदिवस आत्महत्येच्या घटनांमध्ये वाढ होत असताना जळगावातून धक्कादायक बातमी समोर आली आहे. नोकरी मिळत नाही म्हणून उच्चशिक्षित तरुणाने गळफास घेत आत्महत्या केली. नीलेश सुरेश सोनवणे ( वय, 25 रा. अयोध्यानगर, जळगाव) असे मृत तरूणाचे नाव आहे.
काय आहे संपुर्ण बातमी? –
मिळालेल्या माहितीनुसार, जळगावातील अयोध्या नगर येथील नीलेश सुरेश सोनवणे या तरुणाने घरी कोणीही नसताना गळफास घेऊन आत्महत्या केल्याची धक्कादायक घटना घडली. आत्महत्येपूर्वी त्याने सुसाईड नोट लिहून ठेवली. यामध्ये आत्महत्येचे कारण नमूद केले असून ‘पप्पा, मम्मी तुम्ही मला खूप प्रेम दिले, प्लीज मला माफ करा मी तुम्हाला सोडून जातोय,’ असा भावनिक उल्लेखही त्याने त्यात केला आहे.
माझ्या आत्महत्येला कुणीही जबाबदार नाहीये. खूप प्रयत्न करुनही चांगला जॉब लागत नसल्याने मी टेन्शनमध्ये होतो. खूप डिप्रेशनमध्ये आलो होतो आणि कुणीही माझ्या परिवाराला आणि इतर कोणालाही त्रास देऊ नये. मी माझ्या इच्छेने जीवन संपवत आहे, अशा आशयाची सुसाइड नोट नीलेशने लिहिली.
नोकरी मिळत नसल्याने नैराश्येत –
नीलेश सोनवणे याचे पदव्युत्तरपर्यंत शिक्षण झाले होते. तसेच तो आई-वडील व मोठ्या भाऊ यांच्यासोबत जळगावातील अयोध्यानगरात राहत होता. नीलेशने नोकरीसाठी अनेक ठिकाणी अर्ज केला होता. मात्र, नोकरी मिळत नसल्याने काही दिवसांपासून तो तणावात होता. मंगळवारी नीलेश हा घरी एकटा असताना त्या वेळी राहत्या घरात गळफास घेवून त्याने आत्महत्या केली. याप्रकरणी एमआयडीसी पोलीस स्टेशनमध्ये अकस्मात मृत्यूची नोंद करण्यात आली आहे.
हेही वाचा : धक्कादायक बातमी! जळगावातील तुरूंगात कैद्यानेच केला कैद्याचा खून, नेमकं काय घडलं?
