ईसा तडवी, प्रतिनिधी
पाचोरा, 14 ऑगस्ट: पाचोरा-भडगाव तालुक्यातील दिव्यांग बांधवांना दिव्यांग प्रमाणपत्रासाठी जळगाव जिल्हा रुग्णालयात जावे लागत असल्याने मोठ्या अडचणींचा सामना करावा लागत आहे. त्यामुळे पाचोरा येथे दरमहा नियमितपणे दिव्यांग प्रमाणपत्र तपासणी व वाटप शिबिर सुरू करण्यात यावे, अशी मागणी आमदार किशोर आप्पा पाटील यांच्याकडे समर्थ दिव्यांग सामाजिक संस्था संघटनेचे अध्यक्ष परमेश्वर पाटील यांनी निवेदनाद्वारे केली आहे.
दिव्यांग प्रमाणपत्र तपासणी शिबिर सुरू करण्याची मागणी –
पाचोरा व भडगाव तालुक्यातील अनेक दिव्यांगांना प्रमाणपत्र मिळविण्यासाठी जळगावपर्यंत प्रवास करावा लागतो. ग्रामीण भागातील दिव्यांगांसाठी हा प्रवास अत्यंत त्रासदायक ठरत असल्याचे निवेदनात नमूद करण्यात आले आहे. विशेषतः अस्थिव्यंग, अंध, मूक-बधिर तसेच गंभीर आजारांनी त्रस्त असलेल्या दिव्यांगांना बस किंवा खासगी वाहनातून प्रवास करणे, जिल्हा रुग्णालयातील गर्दीत तपासणी करून घेणे यामुळे शारीरिक आणि मानसिक त्रास सहन करावा लागतो.
प्रवासाचा खर्च आणि इतर अडचणींमुळे काही दिव्यांग शासकीय योजनांचा लाभ घेण्यासाठी आवश्यक असलेले प्रमाणपत्र काढण्यासही पुढे येत नसल्याची खंत निवेदनात व्यक्त करण्यात आली आहे. स्थानिक पातळीवरच शिबिर सुरू झाल्यास दिव्यांग बांधवांचा वेळ, पैसा आणि मोठा त्रास वाचू शकतो, असेही निवेदनात म्हटले आहे.
पाचोरा येथेच सुविधा देण्याची मागणी –
जळगाव जिल्ह्यातील इतर तालुक्यांमध्ये स्थानिक पातळीवर दिव्यांग प्रमाणपत्र तपासणीची शिबिरे आयोजित केली जात असल्याचा दाखला देत, पाचोरा येथेही अशी सुविधा उपलब्ध करून देण्याची मागणी करण्यात आली आहे. या शिबिराचा लाभ पाचोरा आणि भडगाव तालुक्यातील गरजू दिव्यांगांना मिळावा, अशी अपेक्षा व्यक्त करण्यात आली आहे.
आमदार किशोर आप्पा पाटील यांनी संबंधित आरोग्य प्रशासन आणि जिल्हा शल्यचिकित्सक यांच्याशी समन्वय साधून हा प्रश्न तातडीने मार्गी लावावा, अशी मागणी परमेश्वर पाटील यांनी केली आहे. पाचोरा येथे नियमित दिव्यांग प्रमाणपत्र तपासणी शिबिर सुरू झाल्यास शेकडो दिव्यांग कुटुंबांना मोठा दिलासा मिळणार आहे, असेही त्यांनी नमूद केले.
हेही वाचा: पाचोरा तालुक्यातील शेवाळे येथे जागतिक आदिवासी दिवस उत्साहात साजरा
