मुंबई, 22 जून: नाशिक विधान परिषद निवडणुकीत महायुतीला मोठा धक्का बसला असून अपक्ष उमेदवार गोकुळ गीते यांनी विजय मिळवला आहे. तर महायुतीचे अधिकृत उमेदवार नरेंद्र दराडे पराभूत झाले आहेत. यानंतर शिवसेना नेत्यांसोबत गोकुळ गीते विशेष विमानाने मुंबईकडे रवाना झाले. दरम्यान, मुंबईत दाखल झाल्यानंतर त्यांनी उपमुख्यमंत्री एकनाथ शिंदे यांची भेट घेतली असून या भेटीबाबत महत्वाची अपडेट समोर आली आहे.
एकनाथ शिंदे यांच्यासोबतच्या भेटीनंतर गोकुळ गीते यांची प्रतिक्रिया –
मुंबईत दाखल झाल्यानंतर नंदनवन या निवासस्थानी उपमुख्यमंत्री एकनाथ शिंदे यांच्यासोबत प्रदीर्घ चर्चा केली असून विधानपरिषदेत शिवसेनेचा सहयोगी सदस्य म्हणून काम करण्याची संधी मिळावी अशी विनंती केली. दरम्यान, एकनाथ शिंदे यांनी यास परवानगी दिली असून उद्या मी विधानपरिषदेत शिवसेनेचा सहयोगी सदस्य म्हणून शपथ घेणार असल्याचे गोकुळ गिते यांनी स्पष्ट केले. येत्या काळात मुख्य नेत्यांकडून पक्ष संघटनेची जबाबदारी दिली तर ती देखील यशस्वीरित्या पार पाडेल, असेही ते यावेळी म्हणाले.
‘गोकूळ गीते शिवसेनेचे सहयोगी सदस्य म्हणून काम करतील’ –
विधानपरिषद निवडणुकीत नाशिकमधून गोकुळ गीते हे निवडून आलेले असून त्यांचे मी मनापासून अभिनंदन करतो. निवडून आल्यानंतर त्यांनी उपमुख्यमंत्री एकनाथ शिंदे यांची भेट घेतली आहे. दरम्यान, एकनाथ शिंदे यांच्या कामांवर प्रभावित होऊन त्यांच्या नेतृत्वाखालील येत्या काळात विधानपरिषदेत ते शिवसेनेचे सहयोगी सदस्य म्हणून काम करतील. तसेच येत्या काळात एकनाथ शिंदे त्यांना पक्ष संघटनेची जबाबदारी देतील ती ताकद पेलण्याची क्षमता त्यांच्यात आहे. यामुळे याबाबतचा निर्णय एकनाथ शिंदे येत्या काळात घेतील, अशी माहिती खासदार श्रीकांत शिंदे यांनी दिली.
या पत्रकार परिषदेला मंत्री उदय सामंत, आमदार किशोर आप्पा पाटील, माजी खासदार राहुल शेवाळे, माजी खासदार उन्मेष पाटील आदी उपस्थित होते.
