धरणगाव, 21 मे: जिल्हा परिषदेच्या जलसंधारण विभागा मार्फत जिल्ह्याभरात सूक्ष्म सिंचनाची कामे मोठ्या प्रमाणात सुरू आहेत. आगामी काळात येणारा पावसाळा व सध्याची टंचाईची स्थिती या पार्श्वभूमीवर जिल्हा परिषदेच्या मुख्य कार्यकारी अधिकारी करिश्मा नायर यांनी आज गुरुवार 21 मे रोजी धरणगांव तालुक्यातील सिंचन प्रकल्प व बंधारे यांची पाहणी करून कामाच्या दर्जाबाबत कोणतीही तडजोड न करण्याच्या सूचना उपस्थित अधिकाऱ्यांना दिल्या.
सूक्ष्म सिंचनाची कामे सुरू –
जळगाव जिल्हा परिषदेच्या जलसंधारण विभागामार्फत जिल्ह्यात सद्यास्थितीत ३४५ सिंचनाची कामे मंजूर करण्यात आली आहेत. त्यापैकी २८९ कामांना कार्यारंभ आदेश देण्यात आले आहेत. तर १०५ कामे पूर्ण झाली आहेत. १५ जून पर्यंत २८९ कामे पूर्ण करण्याचे नियोजन ठेवण्यात आले आहे. या कामांमुळे ३६०० हेक्टर क्षेत्र प्रत्यक्ष अप्रत्यक्षरित्या सिंचनाखाली येणार आहे.
सीईओ करिश्मा नायर यांनी दिल्या महत्वाच्या सूचना –
ग्रामीण भागात अनेक नाले आणि ओढ्यांवर बंधारे बांधून पाणी अडविण्याचे व जिरविण्याचे काम सुरू आहे. धरणगाव तालुक्यातील झुरखेडे, शेरी, बांभोरी, सोनवद, पाळधी, जांभोर, पिंप्री खु येथे सुरू असलेल्या सिंचन प्रकल्पांना भेटी देऊन पाहणी केली. यावेळी सुरू असलेल्या कामांच्या गुणवत्तेबाबत कोणत्याही परिस्थितीत तडजोड न करण्याचे आदेश त्यांनी यावेळी दिले.
या दौऱ्यादरम्यान मुख्य कार्यकारी अधिकारी करिश्मा नायर यांनी झुरखेडा येथील आरोग्य उपकेंद्र व अंगणवाडीला भेट देऊन पाहणी केली. यासोबतच, सोनवद येथील प्राथमिक आरोग्य केंद्राला देखील त्यांनी भेट देऊन पाहणी केली.
